Kaspii qubyr jelisi kontsortsiýmyndaǵy apat el biýdjetine áser etpeidi. Bul týraly ekonomist Aidarhan Qusainov «Resei áskeriniń Ýkrainaǵa basyp kirýiniń Qazaqstan úshin ekonomikalyq saldary» taqyrybynda ótken pikirtalasta aitty, dep habarlaidy Baq.kz portaly.
Onyń aitýynsha, Kaspii qubyr jelisi kontsortsiýmyndaǵy apat el biýdjetine áser etpeidi. Oǵan qosa munaidy eksporttaý boiynsha bul jelini tańdaǵan Qazaqstan Úkimeti emes.
"Qubyr jelisinde rasymen apat boldy, qazir jóndeý jumystary júrip jatyr. Bul - jaǵymsyz jaǵdai, degenmen shyǵyn kóp bolady, bári bitti deýge kelmeidi. Oǵan qosa bul biýdjettiń tolyǵýyna esh áser etpeidi. Bir nárseni túsinip alǵanymyz jón. Munaidan túsetin qarajat aldymen Ulttyq qorǵa quiylady, sodan keiin baryp qana biýdjetke aýdarylady. Qorda qazir aqsha bar, sondyqtan ol biýdjetke úzdiksiz quiylyp otyrady", - dedi ol.
Sonymen qatar ol Qazaqstan munaiyn eksporttaý máselesine qatysty oiyn bildirdi.
"Qazir elmizde óndiriletin munaidy eksporttaýǵa qatysty kóp aitylyp jatyr. Munaidy eksporttaý joldaryna qatysty kelissózderge kezinde ózim de qatysqanmyn. Bul jerde Úkimetke syn aitý durys emes. Munai óndirýshilerdiń ózderi osy joldy tańdaǵan, iaǵni KTK arqyly tasimyz, sol jerge investitsiia quiamyz degen. Kelissózdiń barlyǵy merdiger kompaniialarmen jasalǵan jáne bul - olardyń sheshimi. Oǵan bizdiń bilik qatysqan joq", - dedi Qusainov.
Ekonomist sondai-aq Ýkrainadaǵy soǵysqa bailanysty Qazaqstan munaiyna sanktsiia salynbaitynyn jetkizdi.
"Bul munai bizdiń jerde óndirilgenimen, ol bizdiki emes. Ol óndirýshi kompaniialarǵa tiesili, iaǵni amerikalyq Shevron, Mobil jáne basqalaryna qaraidy. Sondyqtan oǵan alańdaýǵa negiz joq. Bir sózben aitqanda munaidy tasymaldaý jelileriniń bizge qatysy joq jáne munai da bizdiki bolyp sanalmaidy", - dedi sarapshy.
