Qazaqstan men Japoniia birlesip túsirgen «Barymtashylar. Ýaqyt joly» filmi Frantsiiada 16 jeltoqsanda prokatqa shyǵady, dep habarlaidy "Ult aqparat".
«Qazaqfilm» kinostýdiiasynyń málimetinshe, kinokartina Býsan, Tokio, Gioteborg, Shanhai jáne Helsinki kinofestivalderine qatysyp úlgerdi jáne jaqyn arada Cottobus nemis kinofestivali men Torontodaǵy Aziia kinosynyń HKF konkýrsynda kórsetiletin bolady.
Kartinanyń rejisserleri - Erlan Nurmuhambetov (Qazaqstan) jáne Liza Takeba (Japoniia).
Basty rólderde Kann kinofestivali júldesiniń iegeri Samal Esliamova, tanymal japon akteri Mirai Moriiama, qazaqstandyq teatr jáne kino akteri Dýlyǵa Aqmolda jáne jas akter Mádi Menaidarov oinady.
Esterińizge sala ketsek, «Barymtashylar. Ýaqyt joly» filminiń óndirisine Qazaqstan tarapynan Sh.Aimanov atyndaǵy «Qazaqfilm» AQ, japon tarapynan – «Tokyo New Cinema» kompaniiasy atsalysqan.
«Barymtashylar. Ýaqyt joly» filmi jylqy baǵýmen ainalysatyn qarapaiym otbasy týraly baiandaidy. Bir kúni jylqy úshin adam óltirýden taiynbaityn barymtashylar otaǵasyn óltiredi.
12 jasar Oljas barymtashylardyń qolynan mert bolǵan ákesiniń ólimine qaiǵyryp, zulymdyqpen kúresip, otbasyna túsken aýyrtpalyqty qaryndastarymen birge kóteredi. Qorǵansyz qalǵan Oljastyń otbasyna ǵaiyptan paida bolǵan bógde bireý qolushyn sozady.
«Filmniń stsenariii Qazaqstanda bolǵan shynaiy oqiǵaǵa negizdelgen. Jaqyndarynan aiyrylýdyń qandai qiyn ekenin osy oqiǵa arqyly kinematografiialyq tilmen jetkizgim keldi», - deidi rejisser Erlan Nurmuhambetov.
