Foto: Aqorda
Prezident Qasym-Jomart Toqaev Túrikmenstan Halk Maslahatynyń Tóraǵasy Gýrbangýly Berdimuhamedovpen beiresmi kezdesý ótkizdi, dep habarlaidy Ult.kz.
Memleket basshysy mártebeli meimanǵa iltipat bildirip, elimizdiń rýhani astanasy, túrki halyqtaryna ortaq qasietti meken sanalatyn Túrkistan qalasyna saparmen kelgeni úshin rizashylyǵyn jetkizdi.
"Memleketterimiz arasyndaǵy yntymaqtastyqtyń qarqyndy damyp kele jatqany qýantady. Gaz salasynda, sondai-aq kólik-logistika baǵytynda strategiialyq mańyzdy jobalar bar. Biz bul jumystardy baqylaýda ustaimyz. Óitkeni onyń nátijesi qazaq-túrikmen ekonomikalyq bailanystaryn odan ári órkendetýge yqpal etedi", – dedi Prezident.
Qasym-Jomart Toqaev Gýrbangýly Berdimuhamedovti Halyqaralyq beibitshilik jáne senim jylynyń bastalýymen quttyqtady. Onyń aitýynsha, BUU qoldaǵan bul bastama Túrikmenstannyń álemdik deńgeidegi abyroi-bedeli joǵary ekenin kórsetedi.
Halk Maslahatynyń Tóraǵasy Memleket basshysyna kieli Túrkistanda qonaqjailyq tanytqany úshin alǵys aitty. Sonymen qatar Qazaqstan Túrikmenstannyń eń negizgi strategiialyq seriktesteriniń biri ekenin jetkizdi.
"Eki el arasyndaǵy saiasi, saýda-ekonomikalyq jáne mádeni-gýmanitarlyq salalardaǵy qarym-qatynastardyń perspektivasy mol. BUU aiasynda Halyqaralyq beibitshilik pen senim jylyn jariialaý jónindegi Túrikmenstannyń bastamasyna qoldaý kórsetkenińiz úshin rizashylyǵymdy bildiremin", – dedi Gýrbangýly Berdimuhamedov.
Kezdesý barysynda ekijaqty qarym-qatynastardyń barlyq baǵyty boiynsha san qyrly strategiialyq seriktestikti nyǵaitý perspektivasy talqylandy.
Ózara saýda-sattyq kólemin 1 milliard dollarǵa jetkizý úshin bailanystardy damytýdyń tyń múmkindikterin qarastyrý qajettigi atap ótildi.
