Foto: Aqorda
Qasym-Jomart Toqaev pen Serdar Berdimuhamedov keńeitilgen quramda kelissóz júrgizdi, dep habarlaidy Ult.kz.
Áńgimelesý barysynda memleketter basshylary ekijaqty yntymaqtastyqtyń basym baǵyttaryn talqylady. Atap aitqanda, saýda-ekonomikalyq, mádeni-gýmanitarlyq jáne kólik-logistikalyq yqpaldastyq máseleleri qarastyryldy.
Energetika, ónerkásip kooperatsiiasy, aýyl sharýashylyǵy, IT, bilim berý jáne meditsina salalaryndaǵy birlesken jobalardy iske asyrýǵa basa nazar aýdaryldy.
– Qazaq pen túrikmen – ejelden dostyǵy jarasqan týys halyqtar. Bizdiń tarihymyz jáne maqsat-muratymyz – ortaq, mádeni-rýhani qundylyqtarymyz – bir. Biz Túrikmenstanmen yntymaqtastyqty tatý kórshilik jáne ózara qoldaý rýhynda barynsha nyǵaitýǵa airyqsha mán beremiz. Jarqyn bolashaqqa birge qadam basý úshin kúsh jumyldyramyz. Baýyrlas halyqtarymyzdyń igiligi úshin strategiialyq seriktestikti nyǵaita túsemiz. Men buǵan kámil senemin, – dedi Memleket basshysy.
Qazaqstan Prezidenti eki el arasynda barlyq deńgeide belsendi ári tabysty bailanys ornaǵanyn atap ótti. Úkimetterimiz júieli jumys júrgizip, vedomstvoaralyq bailanys nyǵaiyp keledi. Elderimiz kópjaqty qurylymdar aiasynda nátijeli qarym-qatynas jasaidy.
Memleket basshysynyń aitýynsha, Astana men Ashhabadtyń óńirlik, halyqaralyq kún tártibindegi kóptegen másele boiynsha kózqarastary men ustanymdary uqsas.
Qasym-Jomart Toqaev kelissózder barysynda saýda-ekonomikalyq yqpaldastyqqa airyqsha nazar aýdardy. Sońǵy 5 jylda ózara saýda kólemi 4 eseden asyp, jarty milliard dollarǵa deiin ulǵaidy.
Qazaqstanda túrikmen kapitaly bar 140-qa jýyq kompaniia tabysty jumys isteidi. Osy arqyly atalǵan kásiporyndar ekonomikalyq bailanysty nyǵaitýǵa zor úles qosyp keledi. Qazaqstannyń Túrikmenstanǵa quiǵan investitsiiasy 120 million dollardan asty.
Memleket basshysy mádeni-gýmanitarlyq bailanystyń damý qarqynyna toqtaldy. Prezident eki eldiń mádeniet kúnderin alma-kezek ótkizý, kórnekti qairatkerlerdiń eskertkishterin ashý sharalary qos halyqtyń mádeni-rýhani murasyna aitarlyqtai úles qosady dep sanaidy.
