Qazaqstan Respýblikasynyń Prezidenti Qasym-Jomart Toqaev pen Tájikstan Respýblikasynyń Prezidenti Emomali Rahmonnyń birlesken Málimdeme jasady, dep habarlaidy "Ult aqparat" Aqordanyń resmi saityna silteme jasap.
Tájikstan Respýblikasynyń Prezidenti Emomali Rahmonnyń shaqyrýymen Qazaqstan Respýblikasynyń Prezidenti Qasym-Jomart Toqaev 2021 jylǵy 19-20 mamyrda Tájikstan Respýblikasyna resmi saparmen bardy.
Ashyqtyq, dostyq jáne ózara túsinistik rýhynda ótken kelissózder barysynda memleket basshylary qazaq-tájik qatynastarynyń jai-kúiin, saiasi, saýda-ekonomikalyq, mádeni-gýmanitarlyq jáne basqa da salalardaǵy ekijaqty yntymaqtastyqty keńeitý jáne tereńdetý perspektivalaryn egjei-tegjeili talqylady, sondai-aq óńirlik jáne halyqaralyq kún tártibindegi máseleler boiynsha pikir almasty.
Qazaqstan men Tájikstan arasyndaǵy baýyrlastyq jáne dostyq qatynastardy damytý men nyǵaitýǵa sońǵy úsh onjyldyqta Qazaqstan Respýblikasynyń Tuńǵysh Prezidenti – Elbasy Nursultan Nazarbaev pen Tájikstan Respýblikasynyń Prezidenti, Ult Kóshbasshysy Emomali Rahmon úles qosýda.
Taraptar Tájikstan Respýblikasynyń Prezidenti Emomali Rahmonnyń 2018 jylǵy 15 naýryzdaǵy Qazaqstan Respýblikasyna resmi sapary barysynda qol jetkizilgen ýaǵdalastyqtardyń iske asyrylý barysyn oń baǵalady, sondai-aq ekijaqty yntymaqtastyqty odan ári keńeitýge jańa serpin bergen Qazaqstan Respýblikasynyń Prezidenti Qasym-Jomart Toqaevtyń 2021 jyly 19-20 mamyrdaǵy Tájikstan Respýblikasyna jasaǵan alǵashqy resmi saparynyń mańyzdylyǵyn atap ótti.
Qazaqstan Respýblikasy men Tájikstan Respýblikasy arasyndaǵy qarym-qatynastardyń negizderi jáne strategiialyq áriptestik týraly sharttarda bekitilgen qaǵidattar men mindettemelerge degen beiildilikti rastai otyryp, memleket basshylary baýyrlas halyqtar arasyndaǵy ózara qurmet pen qoldaý, túsinistik pen dostyq negizinde memleketaralyq dialogty odan ári damytý maqsatynda tómendegiler jóninde málimdeidi:
Kópǵasyrlyq dostyq pen tatý kórshilik bailanystardy saqtaý, búkil óńirdiń ornyqty damýy men órkendeýin qamtamasyz etý maqsatyndaǵy joǵary jaýapkershilikti tereń sezine otyryp, Qazaqstan Respýblikasy men Tájikstan Respýblikasy arasyndaǵy strategiialyq áriptestikti odan ári damytýǵa umtylystaryn rastady.
Qos memleket arasyndaǵy uzaq merzimdi qatynastardyń údemeli damýy úshin belsendi saiasi dialogtyń mańyzdylyǵyn atai otyryp, joǵary, biik jáne basqa da deńgeilerde senimdi jáne syndarly bailanystardy keńeitýdi qoldady.
Taraptar COVID-19 pandemiiasy jaǵdaiynda onyń jaǵymsyz saldaryn eńserýde ózara járdemdesýdi jalǵastyrýdyń mańyzdylyǵyn atap ótti. Tájikstan Respýblikasynyń Prezidenti Qazaqstan Respýblikasynyń Prezidentine 2020 jyly tájik eline kórsetilgen gýmanitarlyq kómek úshin alǵys bildirdi.
Qazaq-tájik qarym-qatynastarynyń negizgi draiverleriniń biri bolyp tabylatyn saýda-ekonomikalyq yntymaqtastyqty damytýdyń oń úrdisin qanaǵattanýshylyqpen atap ótti. Memleket basshylary úkimetterge ekijaqty saýda kólemin aldaǵy 5 jylda 2 mlrd. AQSh dollaryna deiin ulǵaitý maqsatynda jańa tásilder ázirleýdi tapsyrdy.
2021 jylǵy naýryzda Dýshanbede ótken Ekonomikalyq yntymaqtastyq jónindegi qazaq-tájik úkimetaralyq komissiiasy 16-otyrysynyń jáne Investitsiialyq forýmnyń qorytyndylaryn oń baǵalady.
Qazaqstan men Tájikstan arasyndaǵy taýar ainalymyn arttyrý jáne jetkiziletin taýarlardyń nomenklatýrasyn ulǵaitý jónindegi birlesken jumys tobynyń 3-shi otyrysynyń, sondai-aq taraptardyń 2022-2023 jyldarǵa arnalǵan Taýar ainalymyn arttyrý jónindegi jol kartasyn ázirleý daiyndyǵyn quptady.
Taraptar salalyq kásiporyndar bazasynda, sonyń ishinde erkin ekonomikalyq aimaqtarda, shikizatty túpkilikti ónimge deiin óńdeý boiynsha birlesken óndirister qurý týraly ýaǵdalastyqqa qol jetkizdi, sondai-aq mashina jasaý, ónerkásip, temir jol jáne kóliktiń ózge túrleri, infraqurylym, logistika jáne basqa da salalarda ekijaqty yqpaldastyqty keńeitý múmkindigin qarastyrýǵa ázirligin rastady. Osy oraida, Ónerkásip salasyndaǵy yntymaqtastyq týraly negizdemelik memorandýmǵa qol qoiylǵanyn quptady.
Aýyl sharýashylyǵy salasyndaǵy yntymaqtastyqtyń oń tájiribesin atap ótip, aýylsharýashylyq ónimderin ózara jetkizýdi arttyrý jáne qos eldiń aýmaǵynda kóterme-taratý ortalyqtar qurý boiynsha qajetti qadamdardy qabyldaýdy qoldady.
Tsifrlandyrý salasynda Qazaqstan men Tájikstannyń yqpaldastyǵynyń perspektivalaryn atap ótti. Osy saladaǵy yntymaqtasty jandandyrý ekonomikalyq ósýdiń jańa baǵyttaryn qalyptastyrýǵa jáne qos memlekettiń ekonomikalarynyń investitsiialyq tartymdylyǵyn kóterýge yqpal etetinine kelisti.
Ortaq tarihi, mádeni murany saqtaý men kóbeitýdiń mańyzdylyǵyn moiyndai otyryp, ózara mádeni kúnderdi, kórmelerdi, festivalder men basqa da is-sharalardy ótkizý arqyly mádeni-gýmanitarlyq bailanystardy keńeitýge shaqyrdy.
Qazaqstan men Tájikstan halyqtarynyń jaqyndasýyna mańyzdy úles qosyp otyrǵan qazaq jáne tájik diasporalarynyń ókilderi úshin odan ári qoldaý kórsetý men qolaily jaǵdai jasaýdyń mańyzdylyǵyn atap ótti.
Kóshi-qon salasyndaǵy yntymaqtastyqty jalǵastyrýdyń qajettiligin rastady.
Bilim berý, sonyń ishinde túrli baǵyttar boiynsha mamandar daiarlaý salasyndaǵy yntymaqtastyqty tereńdetýge ózara qyzyǵýshylyq bildirdi. Eki eldiń joǵary oqý oryndarynda bilim alyp jatqan qazaq jáne tájik stýdentteri úshin bilim granttarynyń sanyn eki esege kóbeitýge kelisti.
Parlamentaralyq is-qimyldyń jańa formattaryn qurýdy qosa alǵanda, parlamenttik bailanystardy odan ári keńeitýdi qoldady.
Óńirde dostyq, tatý kórshilik jáne ózara senimdi saqtaýǵa yqpal etetin Ortalyq Aziia memleketteri basshylarynyń Konsýltativtik kezdesýleri turaqty ótkizilýiniń mańyzdylyǵyn basa aitty.
Ózara tiimdi yntymaqtastyqqa qosymsha serpin berý jáne óńirlik turaqtylyq pen qaýipsizdikti qamtamasyz etý maqsatynda XXI ǵasyrda óńirde dostyq, tatý kórshilik jáne yntymaqtastyq ornatý týraly besjaqty shart jasasýdy birlesip ilgeriletýge daiyn ekendikterin bildirdi.
2021 jyly halyqaralyq koalitsiia áskerleriniń Aýǵanstannan shyǵarylatyndyǵyn eskere otyryp, halyqaralyq qoǵamdastyqtyń osy eldegi qaýipsizdikti qamtamasyz etý, beibitshilik protsesin ilgeriletý jáne onyń áleýmettik-ekonomikalyq jandanýy boiynsha sharalar qabyldaýynyń erekshe mańyzdylyǵyn atap ótti. 2021 jylǵy 29-30 naýryzda «Aziia júregi – Ystanbul úderisi» taqyrybynda Dýshanbede ótken Syrtqy ister ministrleri otyrysynyń qorytyndysyn, sondai-aq Tájikstannyń 2021 jylǵy 13-14 shildede «ShYU-Aýǵanstan» bailanys tobynyń kezekti otyrysyn ótkizý týraly bastamasyn joǵary baǵalady.
Aral teńizi basseininiń áleýmettik-ekonomikalyq, sý sharýashylyǵy jáne ekologiialyq problemalaryn sheshýdegi biregei uiym jáne saiasi alań bolyp tabylatyn Halyqaralyq Araldy qutqarý qorynyń (HAQQ) erekshe rólin atap kórsetti. Ortalyq Aziia elderiniń naqty baǵdarlamalar men jobalardy iske asyrý boiynsha halyqaralyq uiymdarmen, donorlarmen, ekologiialyq qorlarmen ózara is-qimylyn keńeitýge shaqyrdy.
Qazaqstan Prezidenti Tájikstannyń HAQQ-qa aǵymdaǵy tóraǵalyǵy sheńberindegi ózara tiimdi yntymaqtastyqty odan ári damytýǵa daiyn ekenin bildirdi.
BUU jáne basqa da halyqaralyq uiymdar sheńberinde eki taraptyń halyqaralyq bastamalaryn ózara qoldaý boiynsha ustanymdarynyń buljymastyǵyn rastady.
Qazaqstan basshysy 2020-2021 jyldary Tájikstannyń Shanhai Yntymaqtastyq Uiymyndaǵy jáne Ujymdyq qaýipsizdik týraly shart uiymyndaǵy tóraǵalyǵyna, sondai-aq Tájikstannyń jahandyq sý bastamalaryna joǵary baǵa berdi. 2020 jylǵy 21 jeltoqsanda «2018-2028 jyldary «Sý turaqty damý úshin» is-qimyldardyń halyqaralyq onjyldyǵynyń maqsattaryna jetý barysyna orta merzimdi jan-jaqty qamtylǵan sholý jónindegi BUU konferentsiiasy» BUU Bas Assambleiasynyń qararyn quptady jáne 2025 jyldy Halyqaralyq muzdyqtardy saqtaý jyly dep jariialaý týraly Tájikstan Prezidentiniń bastamasyn qoldady.
Tájikstan Respýblikasynyń Prezidenti BUU Bas Assambleiasynyń 75-shi sessiiasy barysynda usynylǵan Qazaqstan Respýblikasy Prezidentiniń BUU Qaýipsizdik Keńesine esep beretin Biologiialyq qaýipsizdik jónindegi halyqaralyq agenttigin qurý bastamasyna qoldaý bildirdi.
Tájikstan Prezidenti 2020-2022 jyldary Aziiadaǵy ózara is-qimyl jáne senim sharalary jónindegi keńeske (AÓSShK) Qazaqstannyń tóraǵalyq etý basymdyqtaryn qoldady jáne AÓSShK áleýetin damytýǵa járdem kórsetýge niet bildirdi.
Memleketter basshylary Qazaqstan Respýblikasy Prezidentiniń Tájikstan Respýblikasyna resmi saparynyń nátijelerine oń baǵa berdi jáne onyń qorytyndylary eki baýyrlas halyqtyń túpki múddelerine sáikes ekijaqty qarym-qatynastardy sapaly jańa deńgeige shyǵarýǵa yqpal etetinine senim bildirdi.
Qazaqstan Respýblikasynyń Prezidenti Qasym-Jomart Toqaev Tájikstan Respýblikasynyń Prezidenti Emomali Rahmonǵa jyly qabyldaǵany jáne qonaqjailylyǵy úshin alǵysyn bildirip, Tájikstan Respýblikasynyń Prezidentin ózine qolaily ýaqytta qarymta saparmen Qazaqstan Respýblikasyna kelýge shaqyrdy. Tájikstan Respýblikasynyń Prezidenti shaqyrýdy rizashylyqpen qabyldady. Sapardyń merzimderi diplomatiialyq arnalar arqyly kelisiletin bolady.
Qazaqstan Respýblikasynyń Prezidenti
Qasym-Jomart Toqaev
Tájikstan Respýblikasynyń Prezidenti
Emomali Rahmon
