Jumys sapary aiasynda Qazaqstan Prezidenti Qazan federaldyq ýniversitetine bardy dep habarlaidy "Ult aqparat" Aqordaǵa silteme jasap.
Oqytýshy-professorlar quramymen kezdesýdiń aldynda Nursultan Nazarbaev Qazan qalasynda oqyp jatqan Qazaqstan stýdentterimen áńgimelesti. Memleket basshysy jas qazaqstandyqtarǵa tolaǵai tabys tilep, zor jetistikterge jetýlerine niettestik bildirdi.
Memleket basshysyna Qazan federaldyq ýniversitetiniń Qurmetti professory ataǵy berildi.
Resei Federatsiiasynyń jetekshi oqý oryndarynyń biri sanalatyn ýniversitet ujymyna arnalǵan sózinde Qazaqstan Prezidenti bilim ordasynyń akademiialyq jáne ǵylymi bazasy myqty ekenin, sondai-aq onyń innovatsiialar salasyndaǵy naqty jetistikterin atap ótti.
– Tarihi derekterge sáikes, Qazan ýniversitetinde 1877 jyldan bastap qazaq intelligentsiiasy da bilim ala bastaǵan. Oqý ornynyń Qazaqstanmen tarihi bailanysy búginge deiin jalǵasyp kele jatqany qýantady. Qazirgi ýaqytta munda túrli mamandyq boiynsha 500-den astam qazaqstandyq stýdent oqidy, – dedi Nursultan Nazarbaev.
Memleket basshysy Qazaqstan men Reseidiń 25 jyldyq diplomatiialyq qatynastary kezeńinde eki jaqty saiasi jáne ekonomikalyq yntymaqtastyq úlgi bolarlyq dárejege jetkenin atap ótti.
– Tyǵyz yntymaqtastyǵymyzdyń arqasynda TMD keńistiginde jańa integratsiialyq birlestik – Eýraziialyq ekonomikalyq odaq paida boldy, – dedi Qazaqstan Prezidenti.
Nursultan Nazarbaev Qazaqstan men Tatarstan arasyndaǵy yntymaqtastyqty Astana men Máskeýdiń strategiialyq seriktestiginiń mańyzdy elementi dep atady.
– Qazaqstan úshin baýyrlas tatar halqynyń orny erekshe. Bizdiń tarihi tamyrymyz ortaq, tilimiz, ádet-ǵurpymyz ben salt-dástúrimiz uqsas. Elderimiz arasyndaǵy tarihi dostyq dánekeri Qazaqstan men Tatarstannyń qazirgi kezeńdegi yntymaqtastyǵy úshin berik negiz bolyp otyr, – dedi Memleket basshysy.
Nursultan Nazarbaev eki mádeniet pen halyqty jaqyndastyra túsý isinde tatar diasporasy mańyzdy ról atqaratynyna nazar aýdardy.
Qazaqstan Prezidenti Tatarstan Respýblikasymen birlese júzege asyrylyp jatqan jobalar jóninde aitty.
– Biz mashina jasaý, munai himiiasy, áskeri-tehnikalyq jáne kólik-logistikalyq yntymaqtastyq salalarynda túrli investitsiialyq jobalardy birlese iske asyryp kelemiz. Bizdiń elordalarymyz – Astana men Qazan arasynda baýyrlastyq bailanys ornaǵan, al Almaty men Qazan seriktes qalalar sanalady, – dedi Memleket basshysy.
Nursultan Nazarbaev Qazaqstannyń tsifrlandyrý jáne tehnologiialyq revoliýtsiia jaǵdaiyndaǵy ekonomikalyq damý úderisi jóninde aitty.
Memleket basshysy adami kapitaldyń áleýetin arttyrý jáne intellektýaldy ult qalyptastyrý úshin Qazaqstan tarapynan atqarylyp jatqan jumystar jóninde keńinen áńgimeledi.
Sonymen qatar, Nursultan Nazarbaev «Tildiń úshtuǵyrlylyǵy» jobasynyń iske asyrylý barysy jáne elimizdiń orta bilim berý júiesine IT-tehnologiialardy engizý jóninde aitty.
Memleket basshysy búginde Qazaqstanda halyqaralyq baǵdarlamalardyń talaptaryna sáikes balalardy jaratylystaný-matematika pánderi boiynsha oqytýǵa baǵdarlanǵan 20 ziiatkerlik mektep salynǵanyn atap ótti.
– Indýstriialyq-innovatsiialyq damý úderisiniń talaptaryn eskerip, tehnikalyq jáne kásibi bilim berý isiniń qurylymy men mazmuny jańǵyrtylýda. Qazaqstanda álemdik deńgeidegi joǵary oqý orny sanalatyn «Nazarbaev Ýniversitetiniń» salynýy elimizdiń joǵary bilim berý salasyndaǵy eń iri jáne mańyzdy jobasyna ainaldy. Bul – halyqaralyq standarttarǵa, derbestik jáne akademiialyq erkindik qaǵidattaryna sáikes jumys isteitin Qazaqstandaǵy alǵashqy ýniversitet, – dedi Qazaqstan Prezidenti.
Nursultan Nazarbaev qazaqstandyqtarǵa álemniń úzdik ýniversitetterinde bilim alýǵa múmkindik bergen «Bolashaq» baǵdarlamasynyń nátijeleri jóninde de áńgimeledi.
Memleket basshysy Qazaqstan men Resei arasyndaǵy tatý kórshilik pen dostyq qatynastardy nyǵaitý qajettigine nazar aýdaryp, bul máselede jastar mańyzdy ról atqaratynyn atap ótti.
Osyǵan orai Nursultan Nazarbaev Astana men Máskeý yntymaqtastyǵyn odan ári ilgeriletý úderisine eki eldiń óskeleń urpaǵyn belsendi túrde tartýdy kózdeitin birqatar is-shara uiymdastyrýdy usyndy.
– Qazaqstan men Reseidiń jas kóshbasshylarynyń forýmyn uiymdastyrýdy usynamyn. Bul basqosý jastarǵa memleketterimizdi damytýdyń ózekti máselelerine qatysty óz oilaryn ortaǵa salýǵa jáne naqty usynystar ázirleýge múmkindik beredi. Sondai-aq, mádeni bailanystarǵa tyń serpin berip, elderimizdiń daryndy jáne shyǵarmashyl jastaryna qoldaý kórsetý maqsatymen jas oryndaýshylardyń, sýretshiler men mýzykanttardyń jyl saiynǵy baiqaýlaryn ótkizýdi jandandyrý kerek, – dedi Memleket basshysy.
Qazaqstan Prezidenti sport salasyndaǵy yntymaqtastyqty da nyǵaitý qajettigin atap ótti.
– Bizdiń jas sportshylarymyz arasyndaǵy bailanystar ózekti bolyp sanalady. Eki el jastarynyń arasynda turaqty túrde týrnirler ótkizýdi stýdentter qaýymy qoldaidy dep oilaimyn, – dedi Nursultan Nazarbaev.
Sońynda Memleket basshysy Qazaqstan-Tatarstan dostyǵy men ózara túsinistiginiń izgi dástúri halyqtarymyzdyń igiligi úshin jalǵasyn taýyp, nyǵaia beretinine senim bildirdi.
Qurmetti professor ataǵyn berý rásimi aiaqtalǵan soń Qazaqstan Prezidenti Qazan federaldyq ýniversitetiniń Qurmetti qonaqtar kitabyna qoltańba qaldyrdy.
