Qazaqstan men Resei transshekaralyq ózenderdi birlesip paidalaný jónindegi jumysty talqylady, dep habarlaidy "Ult aqparat" Ekologiia, geologiia jáne tabiǵi resýrstar ministrligine silteme jasap.
Halyqty jáne ekonomika salalaryn sýmen qamtý, lastanýyń aldyn alý, transshekaralyq ózender sýynyń taýsylýy jáne taǵy basqa máseleler Novosibirsk qalasynda ótken Transshekaralyq sý obektilerin birlesip paidalaný jáne qorǵaý jónindegi Qazaqstan-Resei birlesken komissiiasynyń otyrysynda talqylandy.
Kezdesýge taraptardyń teń tóraǵalary QR Respýblikasy Ekologiia, geologiia jáne tabiǵi resýrstar vitse-ministri Erlan Nysanbaev pen Resei Federatsiiasy Sý resýrstary agenttigi basshysynyń orynbasary Vadim Nikanorov qatysty. Sonymen qatar jiynda Qazaqstan Respýblikasy men Resei Federatsiiasynyń ministrlikteri, sý sharýashylyǵy mekemeler, gidrometeorologiialyq qyzmeti, jergilikti atqarýshy organdardyń jáne basqa da uiymdarynyń ókilderi boldy.
«Jinalysta eki el arasyndaǵy transshekaralyq ózenderdiń barlyq basseinderi boiynsha jumys toptary jetekshileriniń baiandamalary tyńdaldy. Taraptar biylǵy kóktemgi sý tasqyny týraly, sý qoimalaryn toltyrý jáne halyq pen ekonomika salalaryn sýmen qamtamasyz etý jaǵdailary, sý resýrstarynyń lastanýy men sarqylýyn boldyrmaý týraly aqparat almasty. Jaiyq ózeniniń ekologiialyq jaǵdaiy jáne gidrologiialyq rejimin jaqsartý máselelerine erekshe nazar aýdaryldy. Kezdesý qorytyndysynda Jaiyq, Ertis jáne basqa iri ózender basseinderindegi zertteýler júrgizýge yntymaqtastyqty arttyrý úshin Biryńǵai jol kartasy bekititildi», delingen habarlamada.
Eske salaiyq, Qazaqstan men Resei álemdegi eń uzyn ortaq qurlyqtaǵy shekara arqyly ǵana emes, Ertis, Esil, Tobyl, Jaiyq, Qaraózen jáne Saryózen, Qiǵash sekildi ortaq transshekaralyq ózender arqyly da bailanysady.
Eki memleket arasyndaǵy sý qatynastary Qazaqstan Úkimeti men Resei Úkimeti arasyndaǵy 2010 jylǵy 7 qyrkúiektegi transshekaralyq sý obektilerin birlesip paidalaný jáne qorǵaý týraly kelisim negizinde retteledi. Osy kelisimge sáikes transshekaralyq sý obektilerin birlesip paidalaný jáne qorǵaý jónindegi Qazaqstan-Resei Birlesken komissiiasy jáne Ertis, Esil, Tobyl, Jaiyq, Qaraózen jáne Saryózen, Qiǵash ózenderiniń basseinderi boiynsha 6 jumys toby jumys isteidi.
