Qazaqstan men Resei Kaspii teńizinde krýiz týrizmin damytady, dep habarlady RF mádeniet ministrligi týrizm boiynsha federaldy agenttiktiń basshysy Oleg Safonov Petropavldaǵy Qazaqstan men Reseidiń XV óńiraralyq yntymaqtastyq forýmynda.
"Qazir Reseide de, Qazaqstanda da bolmaǵan jańa ortaq jobany qolǵa aldyq – Kaspii teńizindegi krýiz týrizmi", — dedi ol.
Safonovtyń sózine súiensek, 2015 jyldan bastap Reseidiń Astrahan jáne Nijegorod oblystaryndaǵy zaýyttarda eki keme qurastyrylyp jatyr. 2020 jyly olar Kaspii teńizinde krýizge shyǵyp, Resei Federatsiiasy, Qazaqstan Respýblikasy, Ázerbaijan, Iran, Túrkimenstandaǵy porttarǵa barady.
"Kaspii mańyndaǵy elderiń bári qoldaý kórsetip otyr. Krýiz sátti damidy degen úmittemiz", — dep sózin túiindedi Safonov.
