Búgin Qazaqstan men Resei óńiraralyq yntymaqtastyq forýmy aiasynda QR Ulttyq ekonomika ministri Qýandyq Bishimbaev pen Reseidiń ekonomikalyq damý ministri Aleksei Ýliýkaev kezdesti. Kezdesý qorytyndysy boiynsha ministrler qol jetkizilgen ýaǵdalastyqtardy bekitetin hattamaǵa qol qoidy, dep habarlaidy Ult.kz tilshisi Baq.kz portalyna silteme jasap.
«Búgin biz saýda ainalymyn damytýdy kózdeitin josparǵa, iaǵni arnaiy hattamaǵa qol qoidyq. Onda 45 shara kózdelgen. Birlesken is-sharalar aiasynda ekonomikanyń túrli salalarynda 4 mlrd dollardyń 27 investitsiialyq jobasyn júzege asyrý josparlanǵan. Olardyń qatarynda «Evrohim», Óskemendegi «Avtovaz», metallýrgiia, agrónerkásip salalaryndaǵy jobalar bar. Biyl eki el arasyndaǵy saýda ainalymyn 700 mln dollarǵa ósirýdi kózdep otyrmyz. Odan keiin kórsetkishti daǵdarysqa deiingi deńgeige jetkizý josparda bar. Kórshi elder arasynda saýda ainalymy tómendegendikten, 2016-2017 jyldarǵa arnalǵan ózara saýdany keńeitýge baǵyttalǵan sharalar tizbesiniń jobasy ázirlendi», - dedi Q.Bishimbaev.
Ministrdiń aitýynsha, Qazaqstan men Reseidiń syrtqy saýda ainalymy birshama tómendegen. Eki eldiń ózara saýdasy 2014 jylmen salystyrǵanda 20-25 paiyzǵa azaiǵan. Bul ekonomikalyq jaǵdaiǵa bailanysty bolyp otyr. Qazaqstandyq taýar óndirýshilerge Reseige shyǵý qiyn, sebebi kórshi elde Qazaqstandaǵy siiaqty tutynýshy suranysy tómen. Jalpy, ekonomika taýardy az tutynatyn boldy. Sondyqtan, kóptegen problemalar saýda kedergilerimen emes, ortaq ekonomikalyq máselelermen bailanysty.
Al Reseidiń ekonomikalyq damý ministri Aleksei Ýliýkaev qos el arasynda saýda boiynsha eshqandai shekteý joq ekenin aitty.
«Biz saýda ainalymyn damytýdy kózdep otyrmyz. Sońǵy bir jarym jylda eki el arasynda quldyraǵan saýda kórsetkishin qalpyna keltirip, saýdany ári qarai damytýdy josparlap otyrmyz. Sondyqtan eshqandai kedergi men shekteý joq», - dedi A.Ýliýkaev.
.jpeg)