Qasym-Jomart Toqaev Resei Federatsiiasynyń Prezidenti Vladimir Pýtinmen júrgizgen kelissózder qorytyndysy boiynsha buqaralyq aqparat quraldarynyń ókilderi úshin brifing ótkizdi, - dep habarlaidy "Ult aqparat" Aqordaǵa silteme jasap.
Qasym-Jomart Toqaev jýrnalister aldynda sóilegen sózinde Qazaqstan Respýblikasynyń Prezidenti retinde Resei Federatsiiasyna jasaǵan alǵashqy saparynyń simvoldyq mánin atap ótip, eki el arasyndaǵy qarym-qatynastardyń erekshe sipatyn aitty.
– Máskeýge resmi saparmen kelýge shaqyrǵan Resei Federatsiiasynyń Prezidenti Vladimir Pýtinge, sondai-aq qonaqjailyq kórsetip, jyly qabyldaǵany úshin reseilik dostarymyzǵa rizashylyq bildiremin. Bul sapar eki taraptyń da odaqtastyqty odan ári damytyp, Qazaqstan men Resei halyqtarynyń dostyq bailanystaryn nyǵaitýǵa umtylatynyn kórsetti, – dedi Memleket basshysy.
Qasym-Jomart Toqaev qatysýshylarǵa Qazaqstannyń Tuńǵysh Prezidenti –Elbasy Nursultan Nazarbaevtyń Memleket basshysy ókilettigin toqtatý týraly sheshimi jóninde aitty jáne bul qadam Qazaqstannyń keleshegi úshin jasalǵan saiasi danalyq pen úlken jaýapkershiliktiń jarqyn úlgisi bolyp tabylatynyn erekshe atap ótti.
– Bul tarihi oqiǵa álemdik qoǵamdastyqtyń bizdiń elimizge zor qurmetpen qaraýyna túrtki boldy. Búginde Nursultan Nazarbaev barsha Qazaqstan halqynyń ystyq yqylasyna bólenip, qoldaýyna ie bolyp otyr. Ol Elbasy mártebesinde Qaýipsizdik Keńesiniń jáne Nur Otan basqarýshy partiiasynyń tóraǵasy laýazymyndaǵy óziniń aýqymdy qyzmetin atqara beredi, – dedi Qazaqstan Prezidenti.
Memleket basshysy óziniń Prezident retindegi qyzmeti Qazaqstan men Resei arasyndaǵy yntymaqtastyqtyń «altyn ǵasyrynda» bastalǵanyn atap ótip, Nur-Sultan men Máskeýdiń jan-jaqty dialogyn nyǵaitý jónindegi strategiialyq baǵdardy jalǵastyrýǵa jáne buǵan deiingi qol jetkizilgen ýaǵdalastyqtardyń sabaqtastyǵyn qamtamasyz etýge zor niettestik bildiretinin aitty.
Sonymen birge, Qasym-Jomart Toqaev Qazaqstanda Resei kapitalynyń qatysýymen munai jáne himiia, jeńil ónerkásip, aýyl sharýashylyǵy, avtomobil jáne temirjol mashinalaryn jasaý salasyndaǵy 100-ge jýyq birlesken jobalardy iske asyratyn 9 myńnan astam kásiporynnyń jumys isteitinin atap kórsetti.
Qazaqstan Prezidenti Resei tarapymen aradaǵy kelissózderdiń taqyryby bolǵan eki eldiń ónerkásip kooperatsiiasy jáne investitsiialyq yntymaqtastyq máselelerine arnaiy toqtaldy.
– Búgin taraptar qol qoiǵan Qazaqstan-Resei ónerkásip kooperatsiiasy salasyndaǵy birlesken is-qimyldar baǵdarlamasy osy baǵyttaǵy jumysqa tyń serpin beredi. Bul baǵdarlamany júzege asyrý traktorlardyń, avtobýstardyń, avtomobilder men basqa da kólik quraldarynyń óndirisin arttyrýǵa múmkindik beredi, sondai-aq elimizde qosymsha jumys oryndaryn ashady, – dedi Memleket basshysy.
Memleket basshysy Qazaqstan men Reseidiń geografiialyq ornalasý ereksheligine toqtala otyryp, eki eldiń kólik-tranzit áleýeti básekege qabiletti mańyzdy basymdyq ekenine toqtaldy, sondai-aq osy múmkindikti tiimdi paidalaný qajettigine nazar aýdardy.
– Bizdiń elderimiz arqyly Eýraziianyń Batysy men Shyǵysyn bailanystyratyn «Batys Eýropa – Batys Qytai» avtomagistrali asa mańyzdy kólik kúre joly bolyp tabylady. Biz shekaralyq ruqsattama núkteleri jumysynyń tiimdiligin arttyrý máselesine de nazar aýdardyq. Bul bizdiń azamattarymyzdyń shekara arqyly ótýin jeńildetýge múmkindik beredi, sondai-aq óńiraralyq saýda-sattyqty damytýǵa yqpal etedi, – dedi Qasym-Jomart Toqaev.
Budan bólek, Qazaqstan Prezidenti energetika jáne janar-jaǵarmai sektorynda ózara is-qimyl jasaýdyń perspektivalaryna, sondai-aq eki eldiń áskeri-tehnikalyq jáne ǵarysh salasyndaǵy yntymaqtastyǵyna, sonyń ishinde Baiqońyr qalasyn gazben qamtamasyz etý máselelerine arnaiy toqtaldy.
Memleket basshysy Qazaqstan men Reseidiń týrizm salasyndaǵy yntymaqtastyǵy týraly aita kele, osy salanyń damýyna qajetti múmkindikterdiń mol ekenin atap kórsetti jáne týristik, kólik-logistikalyq infraqurylymdy damytý, sondai-aq eki eldiń shipajailaryn nasihattaý jumystaryn júrgizý qajettigine basa nazar aýdardy.
Qazaqstan Prezidenti ekijaqty mádeni-gýmanitarlyq bailanystardy odan ári nyǵaitý máselelerine de toqtaldy.
– Kelissózder barysynda Qazaqstanda qoldanbaly ǵylymdarǵa arnalǵan birlesken oqý ornyn ashý máselesi talqylandy, qazaqstandyq ártisterdiń Sankt-Peterbýrgtegi Mýzyka Úiinde bilim alýy jáne Qazaqstannyń Ulttyq murajaiynda Ermitaj kúnderin ótkizý múmkindikteri qarastyryldy, – dedi Qasym-Jomart Toqaev.
Sońynda Qazaqstan Prezidenti júrgizilgen kelissózderdiń nátijesine kóńili tolatynyn aityp, qol jetkizilgen kelisimder Qazaqstan men Reseidiń dostastyqqa, senimdilikke, tatý kórshilikke jáne odaqtastyqqa negizdelgen yntymaqtastyǵyn odan ári nyǵaitýǵa yqpal etetinine senim bildirdi.
Vladimir Pýtin óz sózinde Qasym-Jomart Toqaevqa Resei Federatsiiasyna alǵashqy resmi saparmen kelgeni úshin rizashylyq bildirdi.
– Kelissózder qazirgi Qazaqstan memleketiniń negizin qalaýshy, Qazaqstan Respýblikasynyń Tuńǵysh Prezidenti Nursultan Ábishuly Nazarbaevpen birlesip jemisti jumys istegen jyldarda qalyptasqan dástúrge tolyǵymen sai keletin syndarly jáne iskerlik jaǵdaida júrgizilgenin atap ótkim keledi, – dedi Vladimir Pýtin.
Resei Prezidenti qabyldanǵan birlesken málimdemede Resei men Qazaqstannyń keń aýqymdy strategiialyq seriktestigin nyǵaitýdy kózdeitin ózara kelisim kórinis tapqanyn, sondai-aq ony odan ári damytý úshin naqty jáne jaýapty mindetter qoiylǵanyn atap ótti.
– Jemisti jáne mazmundy kelissózder úshin Qazaqstan Prezidentine jáne Qazaqstannan kelgen bizdiń áriptes dostarymyzǵa shynaiy rizashylyǵymdy bildirgim keledi. Bizdiń kezdesýimizdiń nátijeleri baýyrlas eki el halyqtarynyń igiligi úshin Resei men Qazaqstannyń odaqtastyq qarym-qatynastaryn nyǵaitýǵa septigin tigizetinine senimdimin, – dedi Vladimir Pýtin.
***
Sapar qorytyndysy boiynsha mynadai qujattarǵa qol qoiyldy:
1. Qazaqstan Respýblikasynyń Prezidenti Qasym-Jomart Toqaev pen Resei Federatsiiasynyń Prezidenti Vladimir Pýtinniń birlesken málimdemesi.
2. Resei-Qazaqstan óndiristik kooperatsiiasy salasyndaǵy birlesken is-qimyl baǵdarlamasy.
3. Qazaqstan Respýblikasynyń Úkimeti men Resei Federatsiiasynyń Úkimeti arasyndaǵy «Baiqońyr» keshenin gazben jabdyqtaý jónindegi kelisim.
4. Qazaqstan Respýblikasynyń Tsifrlyq damý, qorǵanys jáne aeroǵarysh ónerkásibi ministrligi men Resei Federatsiiasynyń Ónerkásip jáne saýda ministrligi arasyndaǵy Kásiporyndardyń ǵylymi-tehnikalyq kooperatsiiasy salasyndaǵy ekijaqty yntymaqtastyq jospary.
