Foto: Akorda.kz
Shaǵyn quramdaǵy kezdesýden keiin Qasym-Jomart Toqaev pen Shavkat Mirziioev eki memlekettiń resmi delegatsiialarynyń qatysýymen keńeitilgen quramda kelissóz júrgizdi, dep habarlaidy "Ult aqparat" Aqordanyń resmi saityna silteme jasap.
Prezidentter saýda-ekonomikalyq yntymaqtastyqty nyǵaitýǵa, sonyń ishinde ózara taýar ainalymyn ulǵaitýǵa, investitsiia tartýǵa, ónerkásip, farmatsevtika, aýyl sharýashylyǵy, qurylys, tranzit áleýeti jáne kólik logistikasy salalaryndaǵy kooperatsiiany damytýǵa basa mán berdi. Sondai-aq bilim berý jáne mádeni-gýmanitarlyq salalarda ózara is-áreket máselesi de talqylandy.
Memleket basshysy shaǵyn quramda ótken kelissóz nátijesine joǵary baǵa berip, ekijaqty yntymaqtastyqty dostyq, tatý kórshilik qarym-qatynas jáne ózara qoldaý rýhynda keshendi túrde keńeitýge nietti ekenin jetkizdi.
Qasym-Jomart Toqaev elderimiz búginde memleketaralyq seriktestikke úlgi bolatyndai berik ári úilesimdi qarym-qatynas ornatqanyn atap ótti.
– Odaqtastyq qarym-qatynas týraly shartqa qol qoiý bizdiń memleketaralyq bailanystarymyzdyń joǵary deńgeide ekenin kórsetedi. Eger biz shartty tarihi mańyzy bar qujat dep ataityn bolsaq, bul asyra aitqandyq emes dep oilaimyn. Bul asa mańyzdy qujat biz úshin jańa múmkindikterge jol ashady jáne eki eldiń ózara yntymaqtastyqty nyǵaitýǵa degen ortaq umtylysyn bildiredi. Budan bólek, búgin Qazaqstan men Ózbekstannyń memlekettik shekaralaryn demarkatsiialaý týraly shartqa qol qoiylady. Bul tarihi kelisim Qazaqstannyń ońtústigindegi memlekettik shekarasyn halyqaralyq-quqyqtyq turǵyda rásimdeý isin tolyǵymen aiaqtaidy, – dedi Prezident.
Memleket basshysy odaqtastyq qarym-qatynasty nyǵaitý jolyndaǵy birlesken is-áreketter búkil Ortalyq Aziianyń ornyqty damýy men turaqtylyǵyn qamtamasyz etýge eleýli úles qosatynyn atap ótti.
Sonymen qatar kelissóz barysynda prezidentter ekijaqty yntymaqtastyqtyń saiasi tuǵyrnamasyn bekemdei túsetin Joǵary memleketaralyq keńes pen Parlamentaralyq keńes qurý jóninde ýaǵdalasty.
Qasym-Jomart Toqaev taraptar túrli halyqaralyq qurylymdar men mehanizmder aiasynda tabysty jumys júrgizip kele jatqanyn aitty. Óńirlik jáne halyqaralyq kún tártibindegi kóptegen másele boiynsha Qazaqstan men Ózbekstannyń ustanymdary ortaq, kózqarastary uqsas.
Óz kezeginde Shavkat Mirziioev shaǵyn quramdaǵy kelissózdiń nátijeli bolǵanyn atap ótip, taýar ainalymynyń ulǵaiǵanyna jáne birlesken jobalardyń sátti júzege asyrylyp jatqanyna toqtaldy.
– Sizdiń memlekettik saparyńyz bizdiń ǵasyrlar boiy qalyptasqan dostyq, tatý kórshilik jáne ózara qoldaý sipatyndaǵy bailanystarymyzdyń qanshalyq berik ekenin taǵy naqtylai túsedi. Bizdiń halyqtarymyzdyń tarihy men taǵdyry bir-birimen bite qainasqan. Elderimizdiń tarihi tamyry ortaq ári biz ózekti máselelerdi birlese sheshemiz, – dedi Ózbekstan Prezidenti.
Sondai-aq taraptar mádeni-gýmanitarlyq bailanystardyń damýyna oń baǵa berdi. Eki el halqynyń ortaq rýhani-mádeni qundylyqtaryn baiyta túsken Qazaqstan men Ózbekstannyń mádeniet kúnderi tabysty ótti. Sondai-aq elderimizdiń bilim berý salasyndaǵy yntymaqtastyq máselesi de qarastyryldy.
