Qazaqstan Respýblikasynyń Prezidenti Qasym-Jomart Toqaev pen Ózbekstan Respýblikasynyń Prezidenti Shavkat Miziioev júrgizilgen kelissózderdiń qorytyndysy boiynsha BAQ ókilderi úshin brifing ótkizdi, dep habarlaidy "Ult aqparat" Aqordaǵa silteme jasap.
Jýrnalister aldynda sóz alǵan Qazaqstan Prezidenti Q.Toqaev Ózbekstan Respýblikasyna jasaǵan memlekettik sapary osy eldegi Qazaqstan jylynyń ashylýymen tuspa-tus kelgenin atap ótip, bul oqiǵalar eki el arasyndaǵy qarym-qatynastardyń nyǵaiýyna septigin tigizetinine toqtaldy.
Qasym-Jomart Toqaev Memleketter arasyndaǵy qarym-qatynastardyń nyǵaiýy men damýy jolyndaǵy Tuńǵysh Prezident – Elbasy Nursultan Ábishuly Nazarbaev pen Ózbekstan Prezidenti Shavkat Mirziioevtiń róline erekshe toqtaldy.
– Olar Qazaqstan men Ózbekstannyń yntymaqtastyq tarihynyń jańa paraǵyn ashyp, bizdiń bailanystarymyzdy jańa ári sapaly deńgeige shyǵardy. Qazaqstan basshysy retinde men Elbasy saiasatynyń sabaqtastyǵyn qamtamasyz etip, Qazaqstan-Ózbekstan qatynastarynyń jan-jaqty damýyn jalǵastyra beremin. Buǵan dálel retinde búgin biz qol qoiǵan negizgi jetistikterimiz ben yntymaqtastyq kókjieginiń keleshegi qamtylǵan Prezidentterdiń Birlesken málimdemesin aitýǵa bolady, – dedi Memleket basshysy.
Eki eldiń saýda-ekonomikalyq yntymaqtastyǵyndaǵy joǵary deńgeidi aita kelip, Qazaqstan Prezidenti osy joǵary kórsetkishterdi odan ári qoldaý úshin birqatar shara qabyldanatynyn jetkizdi.
– Jańa múmkindikter izdep, taýar nomenklatýrasyn keńeitý qajettigi týraly aityldy. 2020 jyldyń sońyna qarai ózara taýar ainalymyn 5 milliard dollarǵa deiin jetkizý – bizdiń negizgi maqsatymyz, – dedi Qasym-Jomart Toqaev.
Óndiristik kooperatsiialardyń damýy boiynsha, Memleket basshysy bizneske jasalǵan jaǵdaidyń nátijesinde eki eldiń birlesken kásiporyndarynyń sany artqanyn atap ótti.
– Mundai yntymaqtastyqtyń mysaly retinde Qazaqstandaǵy birlesken jeńil avtomobil, júk kóligi jáne basqa tehnikalardy quraý jobalaryn aitýǵa bolady. Atalǵan salalardyń bizdiń ekonomikalarymyz úshin mańyzy zor bolǵandyqtan, osy baǵyttaǵy jumystardy qarqyndy túrde jalǵastyra beremiz, – dedi Memleket basshysy.
Sondai-aq, Qasym-Jomart Toqaev byltyr jyl sońynda ótken Óńiraralyq yntymaqtastyq forýmynyń sátti ótkenin atap ótip, bundai kezdesýlerdiń eki el úshin jańa múmkindikter ashatynyn aitty.
- Qazaqstan men Ózbekstan shekarasynda halyqaralyq saýda-ekonomikalyq yntymaqtastyq ortalyǵyn qurý máselesi erekshe qaraldy. Bul jobany júzege asyrý shekaralyq aimaqtaǵy saýdany rettep, baqylaý-ótkizý infraqurylymyn jaqsartýǵa, sondai-aq, Ortalyq Aziiada iri saýda-logistikalyq hab qurýǵa múmkindik beredi – dedi Memleket basshysy.
Budan basqa Qazaqstan Prezidenti otyn jáne sý-energetika salasyndaǵy ózara is-qimyl, eksport-importtyq, tranzittik tasymal salasyndaǵy yntymaqtastyq, mádeni-gýmanitarlyq jáne jastar bailanysyn keńeitý máselelerine toqtaldy.
Sońynda Qasym-Jomart Toqaev kelissózderdiń nátijelerine qanaǵattanatynyn bildirip, qol jetkizilgen kelisimderdi júzege asyrý Qazaqstan men Ózbekstan yntymaqtastyǵyn dástúrli dostyq, senim jáne tatý kórshilik yntymaqtastyqta damytatynyn aitty.
Shavkat Mirziioev óz sózinde Qasym-Jomart Toqaevpen ashyq ári tolyq ózara túsinistik rýhynda ótken kelissózderge joǵary baǵa berdi. Sonyń barysynda taraptar qarym-qatynasty damytýdyń uzaq merzimdi maqsattarynyń ortaq ekenin rastap, kún tártibindegi ekijaqty, óńirlik jáne halyqaralyq yntymaqtastyq máselelerin jan-jaqty talqylady, sondai-aq jańa synaqtar men qaýipsizdikke tónetin qaterlerge qarsy turý jónindegi birlesken sharalardy kúsheitýdiń mańyzdylyǵyn atap ótti.
– Qazaqstan men Ózbekstan qarym-qatynastaryn nyǵaitýǵa jáne jan-jaqty yntymaqtastyqty keńeitýge baǵa jetpes úles qosqany úshin qazaq halqynyń birtýar perzenti, Qazaqstan Respýblikasynyń Tuńǵysh Prezidenti – Elbasy, meniń aǵam, qurmetti Nursultan Ábishuly Nazarbaevqa alǵys aitqym keledi. Qazaqstannyń memlekettigin nyǵaitýdaǵy, berik azamattyq qoǵam qalyptastyrýdaǵy, zamanaýi jáne básekege qabiletti ekonomika qurýdaǵy, halyqaralyq arenadaǵy el bedelin arttyrýdaǵy zor jetistikter onyń esimimen tikelei bailanysty, – dedi Ózbekstan Prezidenti.
Sonymen qatar, Shavkat Mirziioev sapar barysynda qol jetkizilgen ýaǵdalastyqtardy iske asyrý úshin Jol kartasy bekitiletinin aitty.
***
Memlekettik sapar qorytyndysy boiynsha mynadai qujattarǵa qol qoiyldy:
1. Qazaqstan Respýblikasynyń Prezidenti Qasym-Jomart Toqaev pen Ózbekstan Respýblikasynyń Prezidenti Shavkat Mirziioevtiń birlesken málimdemesi.
2. Qazaqstan Respýblikasynyń Úkimeti men Ózbekstan Respýblikasynyń Úkimeti arasyndaǵy Eńbek qyzmeti jáne eńbekshi kóship-qonýshylardyń quqyqtaryn qorǵaý týraly kelisim.
3. Qazaqstan Respýblikasynyń Úkimeti men Ózbekstan Respýblikasynyń Úkimeti arasyndaǵy Zańsyz kóshi-qonmen kúres boiynsha yntymaqtastyq týraly kelisim.
4. Tabys pen múlikke qosarlanǵan salyq salýdy boldyrmaý týraly kelisim aiasynda Qazaqstan Respýblikasynyń men Ózbekstan Respýblikasynyń ýákiletti organdary bergen rezidenttikti rastaityn resmi qujattardy taný tártibi týraly notalarmen almasý túrindegi kelisim.
5. Qazaqstan Respýblikasynyń Syrtqy ister ministrligi men Ózbekstan Respýblikasynyń Syrtqy ister ministrligi arasyndaǵy 2019-2020 jyldarǵa arnalǵan yntymaqtastyq baǵdarlamasy.
6. Qazaqstan Respýblikasynyń Qorǵanys ministrligi men Ózbekstan Respýblikasynyń Qorǵanys ministrligi arasyndaǵy Áýe shabýylyna qarsy qorǵanys salasyndaǵy yntymaqtastyq týraly kelisim.
7. Qazaqstan Respýblikasynyń Qorǵanys ministrligi men Ózbekstan Respýblikasynyń Qorǵanys ministrligi arasyndaǵy Áskeri ushaqtardy qabyldaý, aerodrom-tehnikalyq qamtamasyz etý jáne áskeri aerodromdarda áskeri áýe kemelerin kúzetý týraly kelisim.
8. Qazaqstan Respýblikasynyń Ulttyq ekonomika ministrligi men Ózbekstan Respýblikasynyń Investitsiialar jáne syrtqy saýda ministrligi arasyndaǵy «Ortalyq Aziia» halyqaralyq saýda-ekonomikalyq yntymaqtastyq ortalyǵyn qurý máseleleri jónindegi ózara túsinistik týraly memorandým.
9. Qazaqstan Respýblikasynyń Aqparat jáne qoǵamdyq damý ministrligi men Ózbekstan Respýblikasynyń Ministrler Kabineti janyndaǵy Din isteri jónindegi komitet arasyndaǵy yntymaqtastyq týraly memorandým.
