Búgin QR Parlamenti Senatynyń jalpy otyrysynda Qazaqstan men Ózbekstan Úkimetteri arasyndaǵy eńbekshi migranttardyń eńbek qyzmeti jáne olardyń quqyqtaryn qorǵaý týraly kelisimdi ratifikatsiialaý týraly zań qabyldandy, - dep habarlaidy "Ult aqparat".
Senattyń jalpy otyrysynda «Qazaqstan Respýblikasynyń Úkimeti men Ózbekstan Respýblikasynyń Úkimeti arasyndaǵy Qazaqstan Respýblikasynyń azamattary bolyp tabylatyn eńbekshi kóship-qonýshylardyń Ózbekstan Respýblikasyndaǵy jáne Ózbekstan Respýblikasynyń azamattary bolyp tabylatyn eńbekshi kóship-qonýshylardyń Qazaqstan Respýblikasyndaǵy eńbek qyzmeti jáne quqyqtaryn qorǵaý týraly kelisimdi ratifikatsiialaý týraly» zań jobasy jaiynda QR Eńbek jáne halyqty áleýmettik qorǵaý ministri Birjan Nurymbetov baiandady.
«Kelisimge 2019 jyly 15 sáýirde Tashkent qalasynda Memleket basshysy Qasym-Jomart Toqaevtyń memlekettik sapary barysynda qol qoiylǵan bolatyn. Kelisimniń maqsattary - taraptardyń memleketterindegi kóshi-qon aǵyndaryn retteý jáne zańsyz eńbek qyzmetin boldyrmaý jónindegi sharalardy júzege asyrýy. Kelisimdi ratifikatsiialaý eki eldiń arasyndaǵy eńbek kóshi-qony protsesin retteý salasyndaǵy yntymaqtastyqtyń nyǵaiýyna yqpal etedi dep sanaimyz», - dedi ol.
Kelisimge sáikes, eńbekshi migranttar qabyldaýshy memlekettiń zańdary men eńbek shartynyń talaptaryna sáikes demalýǵa, ainalasyndaǵy adamdar úshin qaýip tóndiretin aýrýlar kezinde tegin meditsinalyq kómektiń kepildendirilgen kólemin alýǵa quqyly bolady. Sonymen qatar tegin meditsinalyq kómektiń kepildik berilgen kóleminiń tizimine kirmegen meditsinalyq qyzmetter aqyly negizde nemese erikti meditsinalyq saqtandyrý aiasynda kórsetiledi.
Eńbekshi migranttardyń tólemi men basqa da eńbek jaǵdailary qabyldaýshy memlekettiń zańnamasyna sáikes jumys berýshimen eńbek shartynda retteledi. Bul rette eńbekaqy tómen bolmaýǵa, al eńbek jaǵdailary qabyldaýshy memlekettiń azamattaryna qaraǵanda qolailylyǵy jaǵynan tómen bolmaýǵa tiis.
Zań jobasy talqylanǵannan keiin senatorlar oǵan biraýyzdan qoldaý bildirip, qujat qabyldandy.
