Ózbekstanmen ózekti dini máseleler boiynsha ortaq pátýa qabyldanady, dep habarlaidy Qazaqstan musylmandary dini basqarmasynyń baspasóz qyzmeti.
Qazaqstan musylmandary dini basqarmasynyń tóraǵasy Serikbai qajy Orazdyń Ózbekstanǵa jasaǵan resmi sapary barysynda eki eldiń dini merekelerine qatysty ortaq pátýa shyǵarý týraly kelisim jasaldy.
Bas múfti Serikbai qajy Satybaldyuly men Ózbekstan musylmandary dini basqarmasynyń tóraǵasy Osmanhan qajy Alimovtyń qatysýymen ótken eki jaqty kezdesýde dini merekelerdi birizge túsirý máselesi talqylandy.
Resmi basqosýda Serikbai qajy Oraz qazaq-ózbek ultynyń ustanatyn mázhaby men dini senimi bir ekenin atap ótip, dini merekelerdi birizge túsirý qajettigin sóz etti. Óz kezeginde Ózbekstan múftii Osmanhan Alimov bul usynysty qoldaitynyn málimdep, baýyrlas elderdiń dini saladaǵy bailanysyn odan ary nyǵaita túsý kerek ekenin tilge tiek etti.
Eki jaqty kezdesý nátijesinde ortaq memorandým qabyldandy.
"Taraptar dini merekelerdi (oraza, qurban ait, t.b.) Hijri jyl sanaýy boiynsha birizdi ótkizýge, zamanaýi ózekti máselelerde ortaq pátýa, sheshim shyǵarýǵa mindetteledi", – delingen ózara yntymaqtastyq týraly memorandým mátininde.
"Ózderińizge belgili, osyǵan deiin bizdiń aramyzda dini merekelerdiń kúnine qatysty aiyrmashylyqtar boldy. Osy olqylyqtyń ornyn toltyrý maqsatynda ózbekstandyq áriptesterimizben kelisim negizinde ózara yntymaqtastyq týraly memorandým qabyldadyq. Memorandýmda kórsetilgen máseleler boiynsha ózekti taqyryptar aiasynda ortaq pátýalar men sheshimder qabyldaityn bolamyz", – dedi Bas múfti Serikbai qajy Oraz ózbekstandyq BAQ ókilderine bergen suhbatynda.
