Qazaqstan Respýblikasy men Ózbekstan Respýblikasynyń úkimettik delegatsiialary Ózbekstannyń Syrdariia aýdany men Qazaqstannyń Túrkistan oblysynyń aýmaqtarynyń bir bóliginiń sý basýyna ákelgen Sardoba sý qoimasyndaǵy tótenshe jaǵdai saldaryn joiý jónindegi máselelerdi birlesip sheshý jónindegi kezdesý ótkizdi, dep habarlaidy primeminister.kz.
QR Premer-Ministriniń orynbasary Roman Skliardyń jetekshiligimen Qazaqstan Respýblikasynyń delegatsiiasynyń quramyna Túrkistan oblysynyń ákimi Ómirzaq Shókeev, QR ekologiia, geologiia jáne tabiǵi resýrstar ministri Maǵzum Myrzaǵaliev pen Qazaqstannyń Ózbekstandaǵy elshisi Darhan Satybaldy kirdi.
Premer-Ministrdiń orynbasary S. Ýmýrzakov bastaǵan Ózbekstan Respýblikasynyń delegatsiiasynyń quramyna ÓR sý sharýashylyǵy ministri Sh. Hamraev pen Syrdariia oblysynyń hokimi G. Mirzaev kirdi.
Úkimettik delegatsiialar eki eldiń sý astynda qalǵan aýmaqtaryn tikushaqpen ushyp aralap shyqty, onyń barysynda taraptar Sardoba sý qoimasynyń dambasynan sý aǵynynyń tolyq toqtaǵanyna kóz jetkizdi.
Osy kúni kelissóz júrgizildi, onda taraptar oryn alǵan jaǵdaidy talqylap, tótenshe jaǵdaidyń saldaryn joiý boiynsha birlesken jumysty atqarýǵa kelisti.
Qazirgi tańda ózbek tarapy Ózbekstan aýmaǵynda bógettiń buzylýynyń saldaryn joiý jumystaryn júrgizýmen qatar, Túrkistan oblysyna, eń aldymen Firdoýsi jáne Órgebas aýyldaryna, sý basý saldaryn joiýǵa járdemdesý úshin 100-den astam tehnika men mamandardy jibergen.
Kelissóz kezinde taraptar Sardoba sý qoimasyn qalpyna keltirý máselesi jóninde ózara kelisilgen jumystardy uiymdastyrý týraly kelisimge qol jetkizdi.
Kezdesý sońynda taraptar eki el arasyndaǵy dástúrli dostyq pen strategiialyq áriptestik sabaqtastyǵyndaǵy tyǵyz yntymaqtastyǵyn odan ári jalǵastyrýǵa niettestigin bildirdi.
