Qazaqstannyń Qytaidaǵy Elshisi Shahrat Nuryshev QHR Mádeniet jáne týrizm ministri Hý Hepinmen kezdesti, dep habarlaidy "Ult aqparat" QR Prezidenti janyndaǵy Ortalyq kommýnikatsiialar qyzmetine silteme jasap.
Kezdesý barysynda taraptar mádeni-gýmanitarlyq bailanystardy odan ári nyǵaitý jáne týrizm salasyndaǵy yntymaqtastyqty damytý máselelerin talqylady.
Nuryshev jaqyn arada qalpyna keletin turaqty áýe qatynastary jáne adami bailanystardyń belsendirilýin eskerip, ekijaqty mádeni-gýmanitarlyq dialogty jandandyrýdyń qajettigine nazar aýdardy. Qazaqstannyń Elshisi QR jáne QHR-da mádeni ortalyqtardy ózara qurý bul baǵyttaǵy ekijaqty qatynastardyń damýyna myqty serpin beretinin atap ótti.
Sonymen qatar, ol suhbattasýshyny Qazaqstannyń týristik múmkindikteri jáne QR Úkimetiniń Týristik salany damytýdyń 2025 jylǵa deiingi memlekettik baǵdarlamasyn júzege asyrý boiynsha sharalarymen tanystyrdy. Sondai-aq, Elshi qazaqstandyq taraptyń QHR azamattary úshin 14 kúndik merzimge deiin vizasyz rejim engizý jónindegi josparyn eskerip, QR azamattary úshin de uqsas jaǵdai jasaý máselesin kóterdi.
Óz kezeginde, Hý Hepin Qazaqstan men Qytai arasyndaǵy mádeniet jáne týrizm salasyndaǵy yntymaqtastyqtyń zor keleshegi bar ekenin erekshe atap ótti. Ol jyl sońynda josparlanǵan Qazaqstan-Qytai yntymaqtastyq jónindegi komitetiniń Mádeni-gýmanitarlyq yntymaqtastyq jónindegi kishi komitetiniń 15-shi otyrysy eki el arasynda mádeni-gýmanitarlyq bailanystardy nyǵaitýda mańyzdy ról atqaratynyna senim bildirdi.
Sonymen birge QHR Mádeniet jáne týrizm ministri Qazaqstan Úkimetiniń eldiń týristik áleýetin ashý boiynsha qabyldap jatqan sharalaryn joǵary baǵalady, sondai-aq qytailyq taraptyń mádeniet ortalyqtardy ózara qurýǵa daiyn ekenin bildirdi.
Kezdesýdiń sońynda taraptar ShYU, AÓSShK jáne «Ortalyq Aziia - Qytai» memleket basshylary onlain-sammitiniń qorytyndylary boiynsha ýaǵdalastyqtardy iske asyrý jónindegi is-qimyldar jospary sheńberinde mádeniet jáne týrizm salasynda birlesken is-sharalardy ótkizý máselelerin qosa alǵanda, QR-dyń QHR-daǵy Elshiligi men QHR Mádeniet jáne týrizm ministrligi arasynda tyǵyz bailanystardy saqtaýǵa kelisti.
