Ishki ister ministrliginiń kóshi-qon qyzmeti qos azamattyqqa qarsy kelisimniń ne úshin ázirlengenin túsindirdi, dep habarlaidy Sputnik Qazaqstan tilshisi.
Komitet tóraǵasynyń orynbasary Sabyrjan Seiitjanovtyń aitýynsha, atalǵan qujattyń negizgi maqsaty – qos azamattyqqa jol bermeý. Budan bólek, qujat rásimdeý jumystary jeńildei túsedi.
"Negizgi másele, qos azamattyq deimiz ǵoi. Zańnama boiynsha bizde qos azamattyq qarastyrylmaǵan. Qytaida da solai. Ótken mamyr aiynda Qytaidyń syrtqy ister ministrliginiń ókilderi kelgen. Sol kezde biz olarmen osy máseleni talqyladyq. Biz 2014 jyldan beri qos azamattyqqa qarsy kelisimdi ázirlep jatyrmyz. Ony Qytai tarapyna jibergen bolatynbyz. Qazir olar da osy qujatty qarap jatyr", - dedi Seiitjanov Sputnik Qazaqstan tilshisine bergen suqbatynda.
Onyń aitýynsha, qazirgi joba boiynsha Qytaidan kelgen oralmandar Qazaqstan azamattyǵyn alsa, bul týraly málimet birden kórshi memleketke jiberiledi.
"Qytai tarapy kerekti belgi qoiyp, olardy óz azamattyǵynan shyǵaratyn bolady. Endi, qazir onyń bári qaralýda. Eger kelisimdi qabyldasaq, azamattyq alǵan adamdar jaily aqparat berýimizdi surady. Qazir biz onyń formasyn, mehanizmderin qarap jatyrmyz. Berýdiń qajeti bar ma, joq pa? Tólqujatpen beremiz be? degen másele sheshilýi kerek. Muny jumys barysynda anyqtaimyz", - dedi Seiitjanov.
Mamannyń sózine qaraǵanda, Qytaimen aradaǵy kelisim rásimdelse, Qazaqstan azamattyǵyn alǵandar boiynsha ózara aqparat almasý jeńildei túsedi.
"Qazirgi tártip boiynsha qandastarymyz azamattyq alǵannan keiin Qytai elshiligine baryp, aryz jazýy qajet. Máselen, bir adam Qazaqstan azamattyǵyn aldy delik. Sodan keiin elshilikke baryp, aryz jazady da, Qytai azamattyǵynan bas tartady. Biraq bul keibir azamattar úshin qolaisyz. Sebebi bireýler alys jerde turady, ondaida baryp-kelý ońai emes. Osyǵan bailanysty biz bul tártipti jeńildetýdi qarastyryp jatyrmyz. Kelisim rásimdelse, qandastarymyzǵa elshilikke barýdyń qajeti bolmaidy. Biz ózimiz aqparat almasatyn bolamyz", - deidi Seiitjanov.
