Qasym-Jomart Toqaev pen Sadyr Japarov shaǵyn formatta ótken kezdesýden keiin eki memlekettiń resmi delegatsiialarynyń qatysýymen keńeitilgen quramda kelissóz júrgizdi, dep habarlaidy "Ult aqparat" Aqordanyń resmi saityna silteme jasap.
Qazaqstan Prezidenti qyrǵyz delegatsiiasyna iltipat bildirip, Sadyr Japarovtyń ekijaqty qatynastardy jańa deńgeige kóterý jónindegi bastamasyn qoldaitynyn aitty.
– Táýelsizdik kezeńinen beri qazaq-qyrǵyz yntymaqtastyǵy barlyq salada qarqyndy damyp keledi. Osy bailanysymyz startegiialyq seriktestik jáne odaqtastyq rýhynda nyǵaia túsýde. Buǵan qos halyqqa ortaq qundylyqtardyń arqasynda qol jetkizdik, – dedi Memleketimizdiń basshysy.
Qasym-Jomart Toqaev shaǵyn formatta ótken kelissózderdiń nátijesine kóńili tolatynyn atap ótip, Qyrǵyzstan Prezidentiniń elimizben aradaǵy kópjaqty seriktestikti tereńdetýge degen nietin joǵary baǵalady.
– Men óz tarapymnan Qazaqstannyń qazaq-qyrǵyz qatynastaryn dostyq, tatý kórshilik jáne shynaiy odaqtastyq rýhynda jan-jaqty nyǵaitýdyń strategiialyq baǵytyna berik ekenin atap ótkim keledi, – dedi Qazaqstan Prezidenti.
Qasym-Jomart Toqaev memleketaralyq qatynastardyń qarqyndy damyp kele jatqanyn aita kele, joǵary deńgeidegi ózara senimdi jáne belsendi saiasi dialogqa, eki el úkimetteriniń úilesimdi jumysyna toqtaldy.
Sondai-aq qyrǵyz kóshbasshysynyń Qazaqstanǵa jasaǵan memlekettik saparynyń qorytyndysy boiynsha qol jetkizilgen ýaǵdalastyqtardyń tabysty júzege asyrylyp jatqanyn aitty. Atap aitqanda, eki el úkimetteri arasyndaǵy bailanystardyń jandanýy, jańǵyrǵan «Qordai – Aq jol» ótkizý beketiniń ashylýy, turaqty gýmanitarlyq kómek kórsetý jáne elektr energiiasymen almasý jóninde sóz boldy.
Sonymen qatar Memleket basshysy álemdik ekonomikanyń qubylmaly jaǵdaiyndaǵy yqpaldastyqtyń jańa formalaryna nazar aýdardy.
Qazaqstan Prezidenti ózara eksporttyq nomenklatýrany keńeitý, qazaq-qyrǵyz shekarasyndaǵy ótkizý múmkindigin, sonyń ishinde kedendik rásimderge tsifrlyq sheshimderdi engize otyryp jaqsartý arqyly taýar ainalymyn ulǵaitý máselelerine toqtaldy.
Budan bólek Qasym-Jomart Toqaev oblystar men óńirler arasyndaǵy keń aýqymdy yqpaldastyqty jolǵa qoiýdyń mańyzdy ekenin atap ótti. Osy rette, Prezident Qazaqstan men Qyrǵyzstan arasynda birinshi Óńiraralyq yntymaqtastyq forýmyn tez arada uiymdastyrýdyń mańyzdy ekenin aitty.
Memleket basshysy ózara tiimdi usynystardy zerdelep jáne perspektivti jobalardyń tizimin jasai otyryp, investitsiialyq yntymaqtastyqty jandandyrýǵa shaqyrdy. Qyrǵyzstanda gidroenergetikalyq nysandy, atap aitqanda Qambar ata GES-in birlesip salý sonyń biri bolýy múmkin.
Kelissózder barysynda sý diplomatiiasy, aqparattyq tehnologiia salasyndaǵy kooperatsiiany nyǵaitý máseleleri qarastyryldy.
Mádeni-gýmanitarlyq bailanystar baýyrlas eki halyqtyń jaqyndai túsýine mańyzdy úles qosady. Memleket basshysy Bishkek qalasynyń ortalyǵynda qazaqtyń uly aqyny Abai Qunanbaiulynyń eskertkishin ashý jónindegi sheshimi úshin Sadyr Japarovqa alǵys bildirdi. Eki el prezidentteri búgingi kelissózderden keiin osy monýmenttiń saltanatty ashylý rásimine barady. Qasym-Jomart Toqaev óz kezeginde Nur-Sultan qalasynda Manasqa eskertkish qoiylatynyn aitty.
Qasym-Jomart Toqaev Qazaqstannyń segiz joǵary oqý orny Qyrǵyzstanda ókildikterin ashýǵa niet bildirip otyrǵanyn atap ótip, qyrǵyz stýdentteri úshin bólinetin kvotalardyń sany 50-ge deiin kóbeigenin jetkizdi.
Qyrǵyzstan Prezidenti óz kezeginde ekijaqty qatynastardyń qarqyndy damyp kele jatqanyn aitty.
– Memleketterimiz arasynda eshqandai saiasi qaishylyq joq. Eń bastysy – osy. Qyrǵyzstan men Qazaqstan kúsh biriktire otyryp, ekijaqty bailanystardy odan ári nyǵaitýdy, sondai-aq aimaqtyq turaqtylyq pen qaýipsizdikti nyǵaitý úshin óńiraralyq jáne halyqaralyq qurylymdar aiasyndaǵy konstrýktivti yqpaldastyqty qamtamasyz etetini jóninde aiqyn túsinik bar, – dedi Qyrǵyzstan Prezidenti.
Kezdesý aiasynda Qazaqstan men Qyrǵyzstan kóshbasshylaryna «Qarasý» jáne «Aq-Tilek» ótkizý beketteriniń aýmaǵynda «Alataý» indýstriialdy saýda-logistikalyq kesheni qurylysynyń bastalǵany týraly beinesiýjet kórsetildi. Bul nysannyń salynýy aradaǵy deldaldardyń sanyn azaitýǵa, tutynýshylar úshin ónimniń ózindik qunyn tómendetýge jáne jetkizý jyldamdyǵyn arttyrýǵa múmkindik beredi.
Kelissózder qorytyndysy boiynsha Qasym-Jomart Toqaev pen Sadyr Japarov ekijaqty yntymaqtastyqty meilinshe jańa deńgeige kóterýge, seriktestikti odan ári jandandyrýǵa jáne halyqaralyq arenadaǵy is-qimyldardy úilestirýge baǵyttalǵan birlesken málimdemege qol qoidy.
Sodan keiin memleket basshylarynyń qatysýymen resmi delegatsiialardyń músheleri mynadai qujattarǵa qol qoidy:
- Qazaqstan Respýblikasynyń Almaty oblysynyń ákimdigi men Qyrǵyz Respýblikasy Prezidentiniń Ystyqkól oblysyndaǵy ókiletti ókiliniń apparaty arasyndaǵy Yntymaqtastyqty nyǵaitýǵa bailanysty kelisimdi jasasý nieti týraly hattama.
- Qazaqstan Respýblikasy Túrkistan oblysynyń ákimdigi men Qyrǵyz Respýblikasy Prezidentiniń Osh oblysyndaǵy ókiletti ókiliniń apparaty arasyndaǵy Yntymaqtastyq týraly memorandým.
- Qazaqstan Respýblikasy Jambyl oblysynyń ákimdigi men Qyrǵyz Respýblikasy Prezidentiniń Talas oblysyndaǵy ókiletti ókiliniń apparaty arasyndaǵy Yntymaqtastyq týraly memorandým.
- Qazaqstan Respýblikasy Saýda jáne integratsiia ministrligi men Qyrǵyz Respýblikasynyń Ekonomika jáne kommertsiia ministrligi jáne «JOINT TECHNOLOGIES» Jaýapkershiligi shekteýli seriktestigi arasyndaǵy «Aq tilek» jáne «Qarasý» avtojol ótkizý pýnktteri aýdanyndaǵy indýstriialyq saýda-logistikalyq keshen infraqurylymyna investitsiia tartý týraly memorandým.
- Qazaqstan Respýblikasynyń Aýyl sharýashylyǵy ministrligi men Qyrǵyz Respýblikasynyń Aýyl sharýashylyǵy ministrligi arasyndaǵy Ózara túsinistik týraly memorandým.
- Qazaqstan Respýblikasynyń Úkimeti men Qyrǵyz Respýblikasynyń Ministrler kabineti arasyndaǵy Shekara mańy aýmaqtarynda tabiǵi órtterdiń profilaktikasy jáne olardy sóndirý jónindegi úkimetaralyq kelisim.
- Qazaqstan Respýblikasynyń Úkimeti men Qyrǵyz Respýblikasynyń Ministrler kabineti arasyndaǵy Aviatsiialyq izdestirý jáne qutqarý salasyndaǵy yntymaqtastyq týraly úkimetaralyq kelisim.
- Qazaqstan Respýblikasynyń Úkimeti men Qyrǵyz Respýblikasynyń Ministrler kabineti arasyndaǵy 2006 jylǵy 4 shildedegi Bilim berý salasyndaǵy yntymaqtastyq týraly kelisimge ózgerister engizý týraly Hattama.
- Qazaqstan Respýblikasy men Qyrǵyz Respýblikasy arasyndaǵy 1996 jylǵy 26 tamyzdaǵy Azamattyq jáne qylmystyq ister boiynsha ózara quqyqtyq kómek kórsetý týraly shartqa ózgerister men tolyqtyrýlar engizý týraly Hattama.
- Qazaqstan Respýblikasy Syrtqy ister ministrligi men Qyrǵyz Respýblikasynyń Syrtqy ister ministrligi arasynda Diplomatiialyq qatynastardyń ornaǵanyna 30 jyl tolýyna orai 2022 jylǵa arnalǵan Syrtqy ister ministrlikteri arasyndaǵy Birlesken is-sharalar jospary.
- Qazaqstan Respýblikasy Qaraǵandy oblysy ákimdigi men Qyrǵyz Respýblikasy Prezidentiniń Shý oblysyndaǵy ókiletti ókiliniń apparaty arasyndaǵy yntymaqtastyq týraly memorandým.
- Qazaqstan Respýblikasy Aqtóbe oblysy ákimdigi men Qyrǵyz Respýblikasy Prezidentiniń Batken oblysyndaǵy ókiletti ókiliniń apparaty arasyndaǵy yntymaqtastyq týraly memorandým.
- Qazaqstan Respýblikasy Atyraý oblysy ákimdigi men Qyrǵyz Respýblikasy Prezidentiniń Jalal-Abad oblysyndaǵy ókiletti ókiliniń apparaty arasyndaǵy yntymaqtastyq týraly memorandým.
