Foto: QR TSM
Qazaqstan Koreiadan Almaty, Astana jáne Shymkentke tikelei reister jiiligin aptasyna 17 reiske deiin arttyrdy, dep habarlaidy Ult.kz.
Ońtústik Koreia – Qazaqstan úshin mańyzdy týristik naryqtardyń biri. 2024 jyly elimizge 40 180 koreialyq keldi – bul 2023 jylmen salystyrǵanda +12,8%, ári pandemiiaǵa deiingi kórsetkishke teń.
Qonaqúilerde túnegen týrister sany da 26 861 adamǵa jetip, 12%-ǵa ósti. Bul ósim vizasyz rejim, tikelei reisterdiń kóbeiýi jáne belsendi ilgeriletý jumystarynyń nátijesi.
Seýlde ótken B2B kezdesýlerde qazaqstandyq týroperatorlar Koreianyń 60-tan astam kompaniiasymen kelissózder júrgizdi. Kazakh Tourism, Almaty Tourism Bureau, Air Astana, SCAT jáne «Shymbulaq» kýrorty sharaǵa belsendi qatysty.
Is-shara Qazaqstannyń Koreiadaǵy elshiliginiń qoldaýymen ótti.
«2024 jyly Qazaqstan ekonomikasy 5,1%-ǵa ósti. Sheteldik investitsiialar kólemi rekordtyq deńgeige jetti. El basshylyǵynyń qoldaýynyń arqasynda týrizm, onyń ishinde MICE-sektor belsendi damyp keledi. 2025 jyly Astanada ótken halyqaralyq forým – sonyń dáleli. Onyń qonaqtarynyń biri – BUU-nyń burynǵy Bas hatshysy Pan Gi Mýn boldy», – dedi QR Koreia Respýblikasyndaǵy elshisi Nurǵali Arystanov.
Air Astana, SCAT jáne Eastar Jet aviakompaniialary reisterge bilet utysyn ótkizdi. Al B2B kezdesý seriktesteri arnaiy demeýshilik sertifikattar usyndy.
Sonymen qatar, Almaty týrizm basqarmasy Seýldegi SITF halyqaralyq kórmesine qatysýdy uiymdastyrýda. Al sáýirde Kazakh Tourism jáne Air Astana Koreianyń 9 iri týroperatoryna aqparattyq týr ótkizdi.
