Foto: Aqorda
Memleket basshysy Kongo Demokratiialyq Respýblikasy Prezidentiniń elimizge alǵashqy saparyn tarihi sát retinde atap ótip, onyń Astanaǵa úlken delegatsiiamen kelýin qazaq halqyna kórsetken zor qurmet dep baǵalady, dep habarlaidy Ult.kz.
– Diplomatiialyq qatynastardyń ornaǵanyna kóp ýaqyt bola qoiǵan joq. Soǵan qaramastan ózara senim men dostyqqa negizdelgen yntymaqtastyq damyp keledi. Búgingi kelissózder Astana men Kinshasa arasyndaǵy bailanysty jańa beleske kóteredi, tiimdi áriptestik ornatýǵa múmkindik beredi. Kongo Demokratiialyq Respýblikasy – Qazaqstannyń Afrikadaǵy mańyzdy seriktesi. Eki el arasyndaǵy qarym-qatynastyń keleshegi zor dep oilaimyn, – dedi Qasym-Jomart Toqaev.
Memleket basshysy búgingi ýaǵdalastyqtar men qol qoiylǵan qujattar ózara tiimdi yqpaldastyqqa tyń serpin beretinine senim bildirdi. Sonymen qatar seriktestiktiń qarqynyn óz deńgeiinde saqtaý úshin eki eldiń syrtqy saiasat vedomstvolary arasyndaǵy turaqty ári iskerlik bailanysty jandandyrýǵa shaqyrdy.
Qasym-Jomart Toqaevtyń aitýynsha, saýda-ekonomikalyq yntymaqtastyq ekijaqty kún tártibiniń basym baǵyty bolýy kerek. Prezident Qazaqstan men Kongo Demokratiialyq Respýblikasynyń tabiǵi resýrstarǵa bai ári ekonomikalyq múmkindigi mol ekenine nazar aýdaryp, eki el ózara tiimdi jobalardy iske asyrýda senimdi seriktes bola alatynyn jetkizdi.
Memleket basshysy asa mańyzdy shikizat materialdary salasyndaǵy KDR-dyń áleýetine joǵary baǵa berip, bul eldiń biregei tabiǵi resýrstary jahandyq jetkizý tizbeginde mańyzdy ról atqaratynyn atap ótti.
Álemdegi kobalt óndirisiniń 76 paiyzy, mystyń 14 paiyzy, qalaiynyń 8,3 paiyzy, tantaldyń 42 paiyzy, koltannyń 40 paiyzy Kongo Demokratiialyq Respýblikasyna tiesili. Sonymen qatar joǵary tehnologiialyq salalarǵa qajetti basqa da strategiialyq mineraldardyń mol qory bar.
Prezident Kongo basshylyǵynyń qoldaýymen qazaqstandyq ERG kompaniiasy atalǵan elde tabysty jumys istep jatqanyn aitty.
Óz kezeginde Feliks Chisekedi Kongonyń ózara yntymaqtastyqty tereńdetýge daiyn ekenin jetkizdi.
– Bizdiń memleketterimiz geografiialyq turǵydan bir-birinen alshaq ornalassa da, halyqtarymyzdy egemendik pen territoriialyq tutastyqty qurmetteý, dialog arqyly beibitshilikke úndeý sekildi ortaq qundylyqtar biriktiredi. Kongo Demokratiialyq Respýblikasy halyqaralyq qoǵamdastyqtyń, sonyń ishinde Qazaqstannyń eń qiyn sátterde kórsetken qoldaýyn eshqashan umytpaidy. Qazaqstan BUU aiasyndaǵy belsendi ustanymymen Kongo halqyna janashyr ekenin dáleldedi. Sondyqtan Sizge shynaiy rizashylyǵymyzdy bildirýge ruqsat etińiz, – dedi KDR Prezidenti.
Feliks Chisekedidiń aitýynsha, Qazaqstan iadrolyq qarýdan bas tartý jáne beibitshilikti saqtaý úshin dáiekti dialogty ilgeriletý arqyly qaýipsizdik pen damýdyń óte mańyzdy ekenin kórsetti. Bul – álem jurtshylyǵyna úlgi.
Kelissóz barysynda ekijaqty saýdany damytý, kólik-logistika, taý-ken, aýyl sharýashylyǵy jáne aqparattyq tehnologiialar, tsifrlandyrý salalaryndaǵy yqpaldastyq máselelerine basa mán berildi.
Kelissóz qorytyndysy boiynsha Qazaqstan Respýblikasynyń Prezidenti Qasym-Jomart Toqaev pen Kongo Demokratiialyq Respýblikasynyń Prezidenti Feliks Chisekedi Birlesken málimdeme qabyldady.
Budan bólek diplomatiialyq konsýltatsiiaǵa, taý-ken jáne geologiia salasyndaǵy yntymaqtastyqqa qatysty vedomstvoaralyq qujattarǵa qol qoiyldy.
