Foto: Gov.kz
Qazaqstan Respýblikasy Syrtqy ister ministri Ermek Kósherbaev pen Izrail Memleketiniń Syrtqy ister ministri Gideon Saar Astanada ótken resmi kelissózder qorytyndysy boiynsha birqatar ekijaqty qujattarǵa qol qoidy, dep habarlaidy Ult.kz.
Taraptar ulttyq pasport ielerin vizalyq talaptardan bosatý jónindegi yqtimal kelisimge qatysty niet týraly memorandýmǵa, qoǵamdyq diplomatiia salasyndaǵy yntymaqtastyq jónindegi ózara túsinistik týraly memorandýmǵa, sondai-aq diplomatiialyq kadrlardy daiarlaý baǵytyndaǵy ózara is-qimyldy kózdeitin qujatqa qol qoidy.
Kelissózder barysynda saýda-ekonomikalyq, investitsiialyq, innovatsiialyq jáne gýmanitarlyq bailanystardy keńeitý máseleleri talqylandy.
QR Syrtqy ister ministri Ermek Kósherbaev Izrail syrtqy saiasi vedomstvosy basshysynyń Qazaqstanǵa sapary ekijaqty qarym-qatynastardy nyǵaitýǵa degen ortaq umtylysty aiqyndaitynyn aitty.
– 2025 jyldyń qańtar–qarasha ailary aralyǵynda Qazaqstan men Izrail arasyndaǵy taýar ainalymy 162 mln AQSh dollaryn quraǵan. Al sońǵy 20 jylda Izrailden Qazaqstan ekonomikasyna shamamen 500 mln dollar kóleminde investitsiia tartylǵan, – dedi Ermek Kósherbaev.
Bul kezdesýde sý resýrstaryn tiimdi basqarý, aýyl sharýashylyǵy, azyq-túlik qaýipsizdigi salalaryndaǵy yntymaqtastyqqa erekshe nazar aýdaryldy. Qazaqstan tarapy Izraildiń sý únemdeý tehnologiialary boiynsha jinaqtaǵan tájiribesin joǵary baǵalap, izraildik kompaniialardy birlesken jobalarǵa shaqyrdy.
Sondai-aq taraptar óńirlik jáne jahandyq kún tártibindegi ózekti máseleler boiynsha pikir almasty. Qazaqstan BUU Qaýipsizdik Keńesi bekitken "eki memleket – eki halyq úshin" qaǵidatyna negizdelgen palestinalyq retteýdi qoldaitynyn taǵy da rastady.
Óz kezeginde Izrail Syrtqy ister ministri Gideon Saar Qazaqstandy Izraildiń mańyzdy seriktesi ári dos eli retinde atap ótti.
– Qazaqstan – bizdiń senimdi áriptesimiz. Elderimiz arasyndaǵy qatynastar ortaq tarih pen demokratiialyq qundylyqtarǵa negizdelgen. Biz Prezident Toqaevtyń bolashaqqa baǵyttalǵan kóregen saiasatyn joǵary baǵalaimyz jáne osy seriktestiktiń áleýetin tolyq iske asyrýǵa niettimiz, – dedi Gideon Saar.
Izrail tarapy ekonomikalyq yntymaqtastyqty keńeitýge, onyń ishinde kiberqaýipsizdik, densaýlyq saqtaý, aýyl sharýashylyǵy jáne sý resýrstaryn saqtaý salalaryna investitsiia salýǵa daiyn ekenin jetkizdi. Osy maqsatta Astanaǵa 30-dan astam biznes ókilinen turatyn delegatsiia kelgen.
