Búgin Parij qalasynda (Frantsiia) joǵary bilim jáne ǵylymi zertteýler salasyndaǵy yntymaqtastyq týraly Deklaratsiiaǵa qol qoiyldy. Qujatqa Qazaqstan Respýblikasy Ǵylym jáne joǵary bilim vitse-ministri Qýanysh Erǵaliev pen Frantsiia Respýblikasynyń Eýropa jáne Syrtqy ister ministrligi janyndaǵy Syrtqy saýda, ekonomikalyq tartymdylyq jáne sheteldegi frantsýz azamattary jónindegi ministr-delegat Olive Besht qol qoidy.
Qazaqstan men Frantsiia eki eldiń ýniversitetteri men ǵylymi-zertteý institýttary arasyndaǵy yntymaqtastyqty damytý týraly kelisim jasasty. Eki el birlesip, bilim berý jáne qos diplomdyq baǵdarlamalardy júzege asyrýǵa qoldaý kórsetedi. Sondai-aq keleshekte Sorbonna-Qazaqstan institýtyn transformatsiialaý boiynsha jumysty odan ári jalǵastyrý josparlanýda.
Qazaqstan men Frantsiia arasyndaǵy akademiialyq utqyrlyq pen ǵylymi yntymaqtastyq bailanys aiasynda eki el de stýdent, oqytýshy, zertteýshi jáne maman almastyrý isin odan ári jalǵastyrady.
«Biz Frantsiiamen aradaǵy deklaratsiiaǵa qol qoidyq. QR Ǵylym jáne joǵary bilim ministrligi «Bolashaq» baǵdarlamasynyń tizimine jańa frantsýz ýniversitetterin engizý múmkindigin qarastyrýǵa daiyn. Frantsiiada taǵylymdamadan ótý úshin biz Qazaqstan men Frantsiia mekemeleri arasynda «500 ǵylymi taǵylymdama» atty baǵdarlamany birlesip nasihattaýdy jón kórip otyrmyz. Magistranttar men doktoranttarǵa arnalǵan «Abai-Vern» shákirtaqylyq baǵdarlamasy odan ári jalǵasady. Sonymen qatar Frantsiianyń Ortalyq Aziiany zertteý institýty qazaqstandyq jáne frantsiialyq úmitkerler úshin gýmanitarlyq jáne áleýmettik ǵylymdar salasyndaǵy ǵylymi utqyrlyq baǵdarlamalaryna qoljetimdilikti jeńildetetin bolady», – dedi ministr Saiasat Nurbek.
Ministrdiń aitýynsha, atalmysh Deklaratsiia Qazaqstan men Frantsiia arasyndaǵy joǵary bilim jáne ǵylymi zertteýler salasyndaǵy ekijaqty qarym-qatynastardy damytýǵa yqpal etedi.
