Qazaqstan Respýblikasynyń Prezidenti Ákimshiligi basshysynyń birinshi orynbasary Timýr Súleimenov pen Prezident Ákimshiligi Basshysynyń orynbasary – Prezidenttiń halyqaralyq yntymaqtastyq jónindegi arnaýly ókili Erjan Qazyhan osy aptanyń basynda Briýsselge jumys saparymen bardy, dep habarlaidy Aqordanyń baspasóz qyzmeti.
Eýropa Odaǵynyń joǵary laýazymdy ókildermen ótken kelissózder barysynda Qazaqstan men Eýroodaq arasyndaǵy saýda, energetika, kólik, qarjy jáne aýyl sharýashylyǵy salalaryndaǵy yntymaqtastyqty keńeitý máseleleri qarastyryldy.
Sapar barysynda saýda máseleleri jónindegi Eýropalyq komissiianyń Vitse-prezidenti Valdis Dombrovskispen, Kólik jónindegi eýrokomissar Adina Valeanmen, Aýyl sharýashylyǵy jónindegi Eýrokomissar Ianýsh Voitsehovskiimen, sondai-aq energetika jáne qarjylyq turaqtylyq jónindegi «FISMA» Direktorattardyń basshylyǵymen resmi kezdesýler ótkizildi.
Sonymen qatar Eýropalyq keńes pen Eýropalyq syrtqy is-qimyl qyzmetiniń basshylyǵymen kelissózder júrgizildi. Taraptar Qazaqstan Prezidenti Qasym-Jomart Toqaevtyń 2021 jylǵy qarashadaǵy Briýsselge sapary ekijaqty jáne kópjaqty yqpaldastyqtyń barlyq baǵyty boiynsha Qazaqstan-Eýropa yntymaqtastyǵyn jandandyrýǵa tyń serpin berdi degen pikirge keldi.
Osy rette Eýropalyq keńestiń basshylyǵyna ekinshi merzimge qaita sailanýyna bailanysty Eýropalyq keńes Prezidenti Sharl Mishelge Memleket basshysynyń jeke joldaý haty tabys etildi. Qazaqstandyq tarap qazirgi halyqaralyq jaǵdaiǵa mán bere otyryp, Keńeitilgen seriktestik pen yntymaqtastyq týraly kelisimdi júzege asyrý aiasynda Qazaqstan men Eýropa Odaǵy arasyndaǵy ózara is-qimyldy keńeitý jáne odan ári nyǵaitý jónindegi naqty sharalarǵa arnaiy toqtaldy.
Atap aitqanda, sanktsiialardyń Qazaqstan ekonomikasyna janama keri áserin barynsha azaitý jáne boldyrmaý qajettigine eýropalyq seriktesterdiń nazaryn aýdardy. Eýropalyq tarap Qazaqstannyń alańdaýshylyǵyna tolyq túsinistik tanytyp, bul másele boiynsha barynsha qoldaý kórsetýge daiyn ekenin málimdedi.
Sonymen qatar eýropalyq tarap Qazaqstan Prezidenti jariialaǵan saiasi jáne ekonomikalyq reformalarǵa aitarlyqtai qyzyǵýshylyq tanytty.
Osyǵan bailanysty Eýropa Odaǵynyń ókilderi Qasym-Jomart Toqaevtyń jaqynda Qazaqstan halqyna arnaǵan Joldaýynyń negizgi tezisterimen egjei-tegjeili tanysyp, Memleket basshysynyń bastamalaryn oń baǵalap, Eýropa Odaǵynyń túrli quraldary arqyly turaqty damý, quqyq ústemdigi baǵytynda olardy iske asyrýǵa qoldaý kórsetýge daiyn ekendigin málimdedi.
Budan bólek Joldaýda aitylǵan saiasi reformalardyń is júzinde oryndalýy elimizdi odan ári saiasi jańǵyrtýǵa jáne Qazaqstan men Eýropalyq Odaq arasyndaǵy yntymaqtastyqty nyǵaitýǵa yqpal etetini atap ótildi.
