Premer-Ministri Asqar Mamin Qazaqstanǵa jumys saparymen kelgen Belarýs Respýblikasynyń Premer-Ministri Roman Golovchenkomen kelissóz júrgizdi. Bul týraly QR Úkimetiniń baspasóz qyzmeti habarlaidy.
Úkimet basshylary saýda-ekonomikalyq, aýyl sharýashylyǵy, energetika, kólik-logistika, qurylys salalaryndaǵy yntymaqtastyqtyń, ónerkásiptik kooperatsiia men bilim berýdiń, sondai-aq óńirlik ózara is-qimyldyń ózekti máselelerin talqylady.
Qostanai qalasynda A. Mamin men R. Golovchenko aýyl sharýashylyǵy mashinasyn jasaý ónimderiniń birlesken óndirisin damytý jobalarymen tanysty.
«AgromashHolding KZ» AQ bazasynda óndiris kólemin jylyna 1 myń birlikke deiin ulǵaita otyryp, «Gomselmash» zaýytynyń tehnologiiasy boiynsha «Esil» kombaindaryn qurastyrý jumystary júrgizilýde. Bul rette qysqa merzimdi kezeńde ónimdi jergiliktendirý deńgeii 60%-ǵa deiin jetkiziledi.
Eki eldiń úkimet basshylary «MTZ Qazaqstan» kásipornynyń damý josparlarymen tanysty. Zaýytta jańa korpýstardyń qurylysy júrip jatyr, bul óndiris kólemin jylyna 4 myń traktorǵa deiin arttyrýǵa múmkindik beredi.
Qostanai qalasyndaǵy «AgromashHolding KZ» AQ lokalizatsiialaý ortalyǵynyń bazasynda «KÝVO» Belarýs kompaniiasymen birlesip, 2022 jyldyń sońynda jylyna 30 myń jiyntyq kóleminde aýyl sharýashylyǵy jáne avtomobil tehnikasyna arnalǵan kóp qabatty shyny paketter óndirisin ashý jáne ony keminde 70% deńgeide jergiliktendirý kózdelgen.
Qostanai qalasynda «Belkarplastik» JShQ-men birlesip, mashina jasaý salasy úshin kompozitsiialyq materialdardan jasalǵan buiymdar óndirisi ashylady. AÓK salasynda taraptar Belarýs tehnologiialaryn tarta otyryp, Qazaqstanda sút-taýar fermalaryn salý boiynsha yntymaqtastyqty damytýdy kózdep otyr.
Eki eldiń isker toptary ókilderiniń ótken kezdesýleri barysynda tiisti ýaǵdalastyqtarǵa qol jetkizildi. Qurylys indýstriiasynda birlesken jobalardy iske asyrý boiynsha ýaǵdalastyqtarǵa qol jetkizildi. Máselen, «BelVýdDoors» kompaniiasy men «Samuryq-Qazyna Konstrakshn» JShS Nur-Sultan qalasynyń indýstriialyq aimaǵynda qýattylyǵy jylyna 250 myń esik óndirisin ashýǵa nietti. Joba quny – 5,5 mlrd teńge.
Budan ári osyndai jobany Almaty qalasynda iske asyrý josparlanǵan. Sondai-aq Qazaqstanda qýattylyǵy 2 mln m² bolatyn keramikalyq plitalardyń birlesken óndirisi ashylady. Kelissózder qorytyndysy boiynsha Belarýs Respýblikasyna munai jáne munai ónimderin jetkizý salasyndaǵy saýda-ekonomikalyq yntymaqtastyq týraly úkimetaralyq kelisimge qol qoiyldy. Eki eldiń Premer-Ministrleri Qostanai qalasyndaǵy «SaryarqaAvtoÓnerkásip» JShS óndiristik alańynda, sondai-aq temir kenin, dolomitti, áktasty, qurylys shaǵyltasyn qaita óńdeitin QR iri kásiporny – Rýdnyi qalasyndaǵy «Sokolov-Sarybai taý-ken baiytý óndiristik birlestigi» AQ-da boldy. Nur-Sultan qalasynda eki eldiń úkimet basshylary ModeX modýldik úi qurylysy zaýytynda, «Lokomotiv qurastyrý zaýyty» AQ-da, «Astana» halyqaralyq qarjy ortalyǵynda jáne basqa da nysandarda boldy.
