Qazaqstannyń energetika ministrligi Belarýstiń "Belneftehim" kontserninen munai tasymaldaý boiynsha ótinish túskenin habarlady.
- "Belneftehim" ministrlikke ótinish túsirdi. Bul vedomstvo ókilderi tasymaldaý máselesin talqylaý úshin Qazaqstanǵa kelmekshi. Qazirgi kezde túrli baǵyt boiynsha munai tasymaldap jatyrmyz jáne Belarýs jaǵynyń usynysyn qarastyramyz, - dedi Qazaqstannyń energetika ministri Nurlan Noǵaev 15 qańtarda.
Onyń aitýynsha, eger munai kompaniialary Belarýs tarabynyń sharttarymen kelisse, taraptar kelisimge qol qoiýy múmkin. Noǵaevtyń aitýynsha, Belarýs delegaty Qazaqstanǵa 20 qańtarda kelýdi josparlap otyr.
Biyl Reseimen munai tasymaldaý boiynsha kelisimge kele almaǵan Belarýs Qazaqstannan bólek Ýkraina, Polsha, Ázerbaijan jáne Baltyq elderine munai satyp alý týraly usynys jasaǵan.
Byltyr qazan aiynda Qazaqstanǵa kelgen Belarýs prezidenti Aleksandr Lýkashenko Belarýstiń Qazaqstannan munai importtaýǵa múddeli bolyp otyrǵanyn jetkizgen. Qazaqstannyń sol kezdegi energetika ministri Qanat Bozymbaev "munai jáne munai ónimderin tasymaldaý jóninde kelisimniń negizgi sharttaryn jasadyq" dep málimdegen.
Qazaqstannan munai tasymaldaý týraly usynysty Lýkashenko alǵash ret 2019 jyly mamyr aiynda Minskide Qazaqstan elshisimen kezdesý kezinde aitqan. Sáýir aiynda "Drýjba" qubyry arqyly Reseiden tasymaldanatyn munaidan las ónimder anyqtalyp, Belarýs munai tasymaldaýdy toqtatqan. Qazaqstan elshisimen kezdesýde Lýkashenko Minskiniń munai óńdeitin zaýyttaryna jan-jaqtan munai ónimderin jetkizgisi keletinin aitqan. Al elshi Ermuhamed Ertisbaev Qazaqstan Belarýsty munaimen qamtamasyz etýge daiyn, tek ol úshin Reseimen kelisý kerek degen.
Eki aptaǵa jýyq ýaqyt buryn Máskeý kútpegen jerden Belarýske munai tasymaldaýdy toqtatqan. Sarapshylardyń aitýynsha, Belarýs baǵany arzandatýdy surasa, Resei munymen kelispeidi. Buǵan deiin Minsk shikizat tasymaldaýdyń balama joldaryn izdeitinin málimdegen.
