Ázerbaijannyń Ekonomika ministri Mikail Djabbarov, Ázerbaijan investitsiialyq holdinginiń bas atqarýshy direktory Rýslan Alihanov jáne SOCAR Prezidenti m.a. – birinshi vitse-prezidenti Rovshan Nadjaf jáne basqa da resmi laýazym ókilderimen áńgimelesý barysynda qazaqstandyq delegatsiia elimizdiń Eýropaǵa eksporttyq júk aǵyndaryn Transkaspii baǵyty boiynsha qaita baǵdarlaýdyń ózektiligi kún tártibine shyqqanyn aitty.
Taraptar Ázerbaijan arqyly munai tasymaldaýǵa qatysty yntymaqtastyqtyń mańyzdylyǵyna toqtalyp, bul qazirgi qoldanystaǵy baǵyttarǵa balama baǵyt ekenin atap ótti. Qazaqstandyq delegatsiia Ázerbaijan Respýblikasynyń Tsifrlyq damý jáne kólik ministri Rashad Nabievpen de kezdesti.
Kezdesý barysynda dáliz boiynsha kólik tarifterin birizdendirý, eki el arqyly ótetin halyqaralyq kólik dálizderinde júk tasymaldaý kólemin ulǵaitý úshin kedendik rásimderdi rettestirý máseleleri talqylandy.
Aimaqta bolyp jatqan qaqtyǵys oqiǵalary men geosaiasi jaǵdaidyń kúrdelenýi jańa aqiqatty aldymyzǵa shyǵardy. Qazirdiń ózinde suranys usynystan asyp ketý qaýpi týyndady. Atalǵan faktorlar negizinde jetkizý quny da, kútý ýaqyty da artyp, onyń tutynýshyǵa keri áserin tigizeri anyq. Bul shyndyq yntymaqtastyqtyń jańa sheńberin qarastyrýdy jáne tranzittik jáne kóliktik kommýnikatsiialardy jańasha qurýdy talap etedi.
Kezdesýde Ázerbaijan men Qazaqstannyń geografiialyq erekshelikteri - olardyń Eýropa men Aziianyń iri ekonomikalyq ortalyqtarynyń arasynda ornalasýy elder arasyndaǵy tiimdi jáne jaqsy jolǵa qoiylǵan kólik jelisin qamtamasyz etý úshin naqty alǵysharttar jasaǵany basa aityldy.
Baký-Tbilisi-Kars temirjol jelisi qurylysynyń aiaqtalýy, bul marshrýtty damytýǵa qosymsha serpin bermek. Bir naqty esep, Qytaidan Qazaqstan arqyly Túrkiiaǵa taýar jetkizý merzimi 12 kúnge deiin qysqarǵany soǵan dáiek.
Eki jaqty kezdesý nátijesinde "Samuryq-Qazyna" AQ men Ázerbaijan Respýblikasynyń Tsifrlyq damý jáne kólik ministrligi arasynda birlesken kásiporyn qurý jáne kólik-logistikalyq qyzmetti júzege asyrý týraly Hattamaǵa qol qoiyldy.
