Nur-Sultan qalasynda Qazaqstan-Amerika jastar forýmy ótip jatyr, dep habarlaidy QazAqparat.
Jastar uiymdarynyń netvorking jáne tájiribe almasý jobasy aiasynda ótken sharaǵa AQSh pen Qazaqstan aýmaǵynda tirkelgen jastar uiymdarynyń ókilderi men eki eldiń birlesken jobalaryna tartylǵan belsendiler qatysty.
Forýmǵa QR Aqparat jáne qoǵamdyq damý ministriniń orynbasary Daniiar Esin qatysyp, óz quttyqtaýyn jetkizdi.
«Nur-Sultanǵa qosh keldińizder! Bizdiń qalanyń erekshe missiiasy bar. Tuńǵysh Prezidentimiz - Elbasy Nursultan Nazarbaevtyń dana saiasatynyń arqasynda astanamyz álemde beibitshilik qalyptastyrýǵa belsendi atsalysyp keledi. Álemdik dinder sezi siiaqty aýqymdy sharalarǵa alań usyný dástúrge arnalǵan. Búgingi forým da sondai paidaly sharanyń biri bolady degen úmit bar. Eń bastysy, biyl elimizde Jastar jyly ótip jatyr. Búgingi forým arqyly eki el jastarynyń tyǵyz qarym-qatynasyn jolǵa qoia alamyz. Forým ǵylym, mádeniet, sport salasyndaǵy birlesken jobalardyń júzege asýyna jol ashyp, úzdik tájiribelerdi bólisýge múmkindik beredi degen úmittemiz», - dedi vitse-ministr.
Forým aiasynda «Bolashaq» qaýymdastyǵy, Azamattyq bastamalardy qoldaý ortalyǵy jáne «Kazakhstan Trade Council» birlesken jobalardy júzege asyrý boiynsha úshjaqty memorandým jasasty. Sondai-aq, «Jas Otan» jáne «Indiana University Fencing Club» arasynda, «Astana jastary» jáne «Words Can Soar» halyqaralyq uiymynyń arasynda kelisimderge qol qoiyldy.
