Qazaqstanda koronavirýs indeti kezine kadr tapshylyǵyn sheshý úshin 30 myń meditsina qyzmetkeri qosymsha kýrstan ótti. Bul týraly QR Densaýlyq saqtaý ministrliginiń resmi ókili Baǵdat Qojahmetov aitty, dep habarlaidy "Ult aqparat".
«Pandemiia jaǵdaiynda kadr qajettiligin sheshý úshin Densaýlyq saqtaý ministrligi ózekti máseleler boiynsha 30 myń meditsina qyzmetkerine qosymsha kýrstar ótkizdi. Sonymen qatar meditsinalyq joǵary oqý oryndarynyń oqytýshylary meditsina qyzmetkerleri úshin turaqty túrde vebinarlar ótkizýde. Sońǵy 4 aidyń ishinde respýblikalyq biýdjet qarajaty esebinen juqpaly aýrýlardyń epidemiologiiasy jáne bioqaýipsizdik, infektsiialyq emes aýrýlardyń aldyn alý jáne tiimdi emdeý kýrstary boiynsha 5 myńnan astam meditsina qyzmetkeri daiyndyqtan ótti. Meditsina kadrlaryn qaita daiarlaý kvotasy boiynsha osy jyldyń 1 tamyzynan bastap 45 epidemiologpen tolyqtyryldy. 1 qarashaǵa taman taǵy da 205 epidemiolog pen 165 jedel meditsinalyq járdem dárigerimen tolyǵatyn bolady», - dedi ol Ortalyq kommýnikatsiialar qyzmetindegi baspasóz máslihatynda.
Sonymen qatar onyń aitýynsha, biylǵy jylǵa arnalǵan bilim berý tapsyrysy aiasynda juqpaly aýrýlar, anesteziologiia men reanimatologiia mamandyqtary boiynsha 200 jáne 240 kóleminde memlekettik bilim berý granttaryn ulǵaitý kózdelgen. Reseilik mamandardy tarta otyryp, «COVID-19-dyń barlyq kezeńinde kómek kórsetý» taqyryby boiynsha syrqattanýshylyq joǵary 4 óńirdiń 200 meditsina qyzmetkeri oqytylǵan.
«Árine, kez kelgen dárigerdi daiyndaý úshin ýaqyt kerek. Degenmen, indet ony kútpeidi. Sondyqtan meditsina qyzmetkerleriniń sanyn arttyrý úshin osyndai qadamdarǵa bardyq», - dedi Baǵdat Qojahmetov.
