Qazaqstan Syrtqy ister ministri Muhtar Tileýberdi Majarstanǵa resmi saparmen bardy, dep habarlaidy "Ult aqparat" vedomstvonyń baspasóz qyzmetine silteme jasap.
Sapar aiasynda M.Tileýberdi Majarstan Syrtqy ekonomikalyq bailanystar jáne syrtqy ister ministri Peter Siiartomen kelissózder júrgizdi. Taraptar pandemiia jaǵdaiynda ekijaqty jáne kópjaqty yntymaqtastyqtyń ózara is-qimylyn nyǵaitý máselelerin talqylap, negizgi jahandyq jáne óńirlik máseleler boiynsha pikir almasty.
Integratsiialyq protsesterdi damytý jáne óńirlik qurylymdar arasyndaǵy, atap aitqanda, Eýraziialyq ekonomikalyq odaq – Eýropalyq Odaq, «Vyshegrad tórttigi + Ortalyq Aziia bestigi» baǵyty boiynsha ózara is-qimyldy damytý qajettiligi atap ótildi, sondai-aq Nur-Sultan men Býdapeshttiń negizgi halyqaralyq máseleler boiynsha ustanymdarynyń ortaqtyǵy belgilendi.
Kelissózder qorytyndysy boiynsha ministrler eki eldiń syrtqy saiasi vedomstvolary arasynda Diplomatiialyq kadrlardy oqytý salasyndaǵy yntymaqtastyq boiynsha ózara túsinistik týraly memorandýmǵa qol qoidy.
Sol kúni QR Syrtqy ister ministri Muhtar Tileýber di men Majarstan Premer-Ministriniń orynbasary – Qarjy ministri Mihai Varganyń tóraǵalyǵymen Qazaqstan-Majarstan strategiialyq keńesiniń tórtinshi otyrysy ótti. Qazaqstandyq syrtqy saiasi vedomstvosynyń basshysy Strategiialyq keńestiń qurylýynyń 5 jyldyq mereitoiy jylynda kezekti otyrysty ótkizýdiń ózektiligin atap ótti.
Otyrystyń aýqymdy kún tártibi ekijaqty yntymaqtastyqtyń barlyq spektrin qamtydy. Saiasi dialogty keńeitý, saýda-ekonomikalyq jáne mádeni-gýmanitarlyq ózara is-qimyldy jandandyrý perspektivalary talqylandy. Aýyl sharýashylyǵy, áskeri-tehnikalyq yntymaqtastyq, bilim berý, farmatsevtika, qarjy, munai-gaz jáne atom ónerkásibi basym baǵyttar retinde belgilendi.
Nur-Sultan – Býdapesht baǵyty boiynsha tikelei áýe qatynasynyń tabysty iske asýy, sondai-aq Qazaqstan-Majarstan tikelei investitsiialar qorynyń qyzmeti (jalpy kólemi - 40 mln AQSh dollary) atalyp ótti. Qor búgingi tańda «Aqtóbe oblysynda joǵary tehnologiialyq jylyjai kesheniniń qurylysy» jáne «Jambyl oblysynda qarqyndy alma baqtaryn qurý» investitsiialyq jobalaryn iske asyrdy.
Taraptar sondai-aq «Keler Group» majarlyq kompaniiasy post-treiding qyzmetteriniń tolyq jiyntyǵyn usynatyn «Astana» Halyqaralyq qarjy ortalyǵymen belsendi yntymaqtastyqty quptady.
Mádeni yntymaqtastyq ekijaqty qatynastardyń taǵy bir mańyzdy elementi. Bizdiń halyqtarymyz jandy tarihi qatynastarmen tyǵyz bailanysty, sebebi Majarstanda Qazaqstannyń Tuńǵysh Prezidenti – Elbasy Nursultan Nazarbaev qurmetti kóshbasshysy bolyp tabylatyn qypshaqtardyń kóptegen urpaqtary turady. Eki eldiń astanalarynda Býdapesht jáne Astana kósheleri ashyldy, sondai-aq Majarstannyń bas qalasyndaǵy Astana kóshesinde Abai Qunanbaiulynyń biýsti ornatyldy.
Bilim berý salasy strategiialyq áriptestik sheńberindegi yntymaqtastyqtyń mańyzdy baǵyty. Majarstan Úkimeti jyl saiyn qazaqstandyq stýdentterdi Majarstannyń joǵary oqý oryndarynda oqytý úshin 250 grant bóledi, bul qazaqstandyq bilim alýshylar sanynyń aitarlyqtai ósýine alyp keldi. Búgingi tańda Majarstanda 500-ge jýyq qazaqstandyq stýdent bilim alýda. Bul rette majar stýdentteri qazaq tilin Seged qalasyndaǵy Ǵylymi ýniversitette jáne Lakitelek halyq institýtynda oqidy.
Is-sharanyń qorytyndysy boiynsha taraptar Strategiialyq keńestiń tórtinshi otyrysy Qazaqstan-Majarstan qatynastaryna jańa serpin beretinine senim bildirdi. Qoiylǵan mindetterdi tiimdi iske asyrý maqsatynda ekonomikalyq yntymaqtastyq jónindegi úkimetaralyq komissiia, týrizm jáne atom ónerkásibi jónindegi jumys toptary, sondai-aq iskerlik keńes tartylady.
Majarstanǵa sapary barysynda M.Tileýberdi Býdapeshttegi Túrkitildes memleketter yntymaqtastyǵy keńesiniń eýropalyq bólimshesinde bolyp, onyń qyzmetimen tanysty.
Jalpy, sapar qorytyndylary Qazaqstan-Majarstan qatynastarynyń aýqymdylyǵyn jáne ózara tiimdi yntymaqtastyqtyń jańa kókjiekterin ashatynyn kórsetti.
