Búgin qazaqstandyq gazdy «Beineý-Bozoi-Shymkent» magistraldy gaz qubyrynan «Ortalyq Aziia - Qytai» transulttyq gaz qubyryna jiberý saltanatty rásimi Astanadaǵy gaz operatorynyń biryńǵai dispetcherlik ortalyǵynda ótti, dep habarlaidy Ult.kz tilshisi QazAqparat agenttigine silteme jasap.
Rásimge QR Energetika ministri Qanat Bozymbaev, «QazMunaiGaz» UK AQ-nyń basqarma tóraǵasy Saýat Myńbaev, «QazMunaiGaz» UK» AQ vitse-prezidenti Qairat Sháripbaev, «QazTransGaz» AQ Bas direktory Rýstam Sýleimanov qatysty. Shymkent qalasy mańynda ornalasqan «Aqbulaq» gaz ólsheý stansasymen onlain bailanys arqyly ótken rásim kezinde qazaqstandyq gazdy eksportqa jiberý júzege asyryldy.
«QazMunaiGaz» UK AQ gaz tasymaldaý jáne marketingi jónindegi vitse-prezidenti Qairat Sháripbaevtiń atap ótýinshe, bul tek gaz salasynyń damýyna ǵana emes, jalpy elimizdiń ekonomikasyn damytýǵa da jańa serpin beretin úlken oqiǵa.
«Qazaqstandyq gazdyń Qytai naryǵyna shyǵarylýy Eýraziialyq óńir elderiniń arasyndaǵy saýda jáne kólik bailanystaryn retteýge, ortaq infraqurylym qurýǵa baǵyttalǵan ózara tiimdi qarym-qatynastar ornatýǵa yqpal etetin bolady», - dedi ol.
Buǵan deiin habarlanǵandai, Qazaqstan Respýblikasy men Qytai Halyq Respýblikasynyń arasynda 5 mlrd tekshe metr qazaqstandyq gazdy eksporttaý týraly tarihi kelisimshartqa qol qoiyldy. «QazTransGaz» AQ men «PetroChina International Company Limited» kompaniiasy arasynda satyp alý-satý shartyna qol qoiyldy. Gazdyń resýrstyq bazasy retinde Qazaqstannyń batysyndaǵy gaz ken oryndary jáne «QazTransGaz» AQ basqarýyndaǵy jerasty gaz qoimalarynda jinaqtalǵan gaz qory aiqyndalyp otyr. Qytai tarapynyń gazdy qabyldaý pýnkti retinde «Qorǵas» shekara beketi belgilendi.
Qazaqstan aýmaǵyndaǵy tabiǵi gazdy eksporttaý marshrýty 3 myń shaqyrymdy quraidy, tasymaldaý protsessine 10-nan astam kompressorlyq stansa jumyldyrylǵan. Qazaqstandyq gazdy Qytaiǵa eksporttaýǵa «Beineý-Bozoi-Shymkent» MGQ jáne «Ortalyq Aziia - Qytai» transulttyq gaz qubyrynyń resýrstary paidalanylatyn bolady.
