QR Tuńǵysh Prezidenti Nursultan Nazarbaev QHR SIM basshysy Van Imen kezdesti, dep habarlaidy "Ult aqparat" Elbasy saityna silteme jasap.
Kezdesýde Nursultan Nazarbaev Qazaqstanda Qytaimen dostyqty joǵary baǵalaitynyn atap ótti.
– Biz tatý kórshilik, dostyq jáne yntymaqtastyq týraly shartqa qol qoidyq, shekara máselesin tolyq sheshtik. Bizdiń qarym-qatynasymyzda eshqandai túitkil bolǵan joq, ári qarai da solai jalǵasýy kerek. Qazaqstan Qytaidyń biraz bastamalaryn qoldaidy. Sonyń biri — «Bir beldeý, bir jol» baǵdarlamasynyń júzege asýy. Ony Qytai Tóraǵasy Si Tszinpin Qazaqstan jerinde jariialaǵan bolatyn. Biz talai sharýa atqardyq, áli de kóp jobalar boiynsha jumys júrgizilýde, – dedi Elbasy.
Qytai Halyq Respýblikasynyń syrtqy ister ministri Qazaqstannyń jetistikterine toqtalyp, Nursultan Nazarbaevqa eki el arasyndaǵy jan-jaqty qatynasty damytýǵa qosqan zor úlesi úshin alǵys aitty. Van I Qazaqstan-Qytai yntymaqtastyǵynyń ári qarai da tereńdei beretinine senim bildirdi.
– Jaqynda Qazaqstan óz táýelsizdiginiń 30 jyldyǵyn atap ótedi. Siz oǵan qol jetkizýdiń bastaýynda turdyńyz. Osy jyldar ishindegi Qazaqstannyń tabysty damýy bárimizdi tánti etedi. Osy jetistiktiń bárine Sizdiń arqańyzda qol jetkizildi. Sizdiń jetekshiligińizben Qazaqstan ósip-órkendedi. Óz elińiz úshin jáne bizdiń memleketterimizdiń arasyndaǵy tatý kórshilik qatynastardy damytý úshin biraz sharýa atqardyńyz. Qytai halqynyń Siz siiaqty senimdi dosy bar. «Bir beldeý, bir jol» bastamasy dál osy jerde – Qazaqstannyń astanasynda bastaý alǵanyn eshqashan umytpaimyz, – dedi Van I.
Qytai Halyq Respýblikasynyń syrtqy ister ministri Nursultan Nazarbaevqa Qytai Tóraǵasy Si Tszinpinniń aýyzsha ystyq sálemin jetkizdi. Onda Qytai Tóraǵasy Elbasyny kez kelgen yńǵaily ýaqytta Qytaiǵa saparmen kelýge shaqyrdy. Shanhai Yntymaqtastyq Uiymyna múshe elderdiń syrtqy ister ministrleri keńesiniń ótken otyrysy týraly aityp berdi. Van I osy jyldar ishinde Qazaqstan Shanhai Yntymaqtastyq Uiymyna eń belsendi qatysýshylardyń biri ǵana emes, sondai-aq kóptegen ideialarǵa, jobalar men baǵdarlamalarǵa bastamashy bolǵanyn atap ótti.
Óz kezeginde Qazaqstannyń Tuńǵysh Prezidenti Qytai Tóraǵasyna izgi tilegin joldady. Sondai-aq ShYU jáne «Bir beldeý, bir jol» jobasynyń mańyzdylyǵy týraly pikirin bildirdi.
– Si Tszinpinge jyly lebizi úshin alǵysym sheksiz. Men ShYU qurylýynyń bastaýynda boldym. Uiymdy saqtaý jáne odan ári damytý kerek dep sanaimyn. Jahandanýǵa qater tónip turǵan qazirgi kezde ShYU jáne «Bir beldeý, bir jol» integratsiia ideiasyn ustanatyn kóptegen halyqtar úshin tyǵyryqtan shyǵýdyń joly bolyp otyr, — dedi Nursultan Nazarbaev.
