Foto:gov.kz
Qazaqstan men Qytai shekarasyndaǵy "Nur Joly" ótkizý pýnktinde QHR-ǵa baǵyt alǵan kólikterdiń kepteliske túskeni baiqalǵan, - dep habarlaidy Qarjy ministrliginiń Memlekettik kirister komiteti.
Vedomstvo málimetinshe, otandyq tasymaldaýshylardyń shekaradan ótýge qajet sheteldik ruqsat blankileriniń bolmaýynan paida boldy. Bul blankiler eki eldiń salalyq kólik vedomstvolary arasynda ózara aiyrbastalady.
"Qalyptasqan jaǵdaidy retteý maqsatynda Qazaqstan Respýblikasy Qarjy ministrliginiń Memlekettik kirister komiteti Kólik ministrligimen birlesip belsendi jumys júrgizip jatyr. Qazir Qazaqstan men Qytaidyń salalyq vedomstvolary qazaqstandyq tarapty qosymsha sheteldik ruqsat blankilerimen qamtamasyz etý máselesi boiynsha kelissózder júrgizip jatyr", - delingen habarlamada.
Sondai-aq, QHR-dyń Bas keden basqarmasymen de kelissózder júrgizilip jatqany atap ótildi.
"Nátijesinde qytai tarapy qabyldaityn avtokóliktiń sanyn ýaqytsha arttyrý jóninde ýaǵdalastyqqa qol jetkizildi. Sondai-aq, qytai ótkizý beketterinde ótkizýdi arttyrý jáne kedendik resimdeýdi jedeldetý jónindegi qosymsha sharalar kelisildi", - dep kórsetildi habarlamada.
Tasymaldaýshylardyń qarjy shyǵynyn barynsha azaitý úshin QR QM MKK "CarGoRuqsat" elektron kezek júiesiniń ákimshisi – "AEO" AQ-men birlesip, belsendi brondardyń qoldanylý merzimin 72 saǵatqa uzartý týraly sheshim qabyldady.
"Bul tasymaldaýshylarǵa júieniń jańartylǵan jumys qaǵidalaryna sáikes bron úshin tólengen 1 AEK somasyn jáne 20 AEK kólemindegi kepildik jarnany saqtaýǵa, sondai-aq sheteldik ruqsattardyń berilýi qaita bastalǵannan keiin ótkizý turaqtylyǵyn qamtamasyz etýge múmkindik beredi", - dep túsindirildi habarlamada.
Budan bólek, Qytai Halyq Respýblikasynyń Kólik ministrliginen "S" sanatyndaǵy jańa ruqsat blankileri partiiasy túskennen keiin, ótinish berip úlgermegen otandyq tasymaldaýshylar belgilengen tártippen buryn brondalǵan kezek arqyly blankilerdi rásimdep, alýǵa múmkindik alady.
MKK jaǵdaidyń turaqty baqylaýda ekenin habarlady. Qabyldanyp jatqan barlyq shara avtokólik ótkizý rejimin jedel qalpyna keltirýge jáne kólik aǵynynyń úzdiksiz qozǵalysyn qamtamasyz etýge baǵyttalǵan.
"Komitet túsinistik tanytqany úshin tasymaldaýshylarǵa alǵys bildiredi jáne sheteldik ruqsat blankileriniń jańa partiiasy kelgenge deiin ótkizý pýnktterine ýaqytsha barmaýdy suraidy", - delingen habarlamada.
Eske salaiyq, qyrkúietiń aiaǵynda Qazaqstan-Resei shekarasynda RF tarapynan baqylaýdyń kúsheiýine bailanysty kezek paida bolǵan edi. QR Kólik ministrliginiń málimetinshe, reseilik qyzmetter júkterdi tekserýdi kúsheitip, kólikti qaraý ýaqytyn ulǵaitty jáne qujattardy, sanitarlyq jáne fitosanitarlyq talaptardy tekserýdiń qosymsha sharalaryn engizdi.
