Elbasy Nursultan Nazarbaev Qytaiǵa memlekettik sapary aiasynda qytailyq biznes kapitandarymen kezdesý ótkizýde, dep habarlaidy QazAqparat tilshisi.
«Qytai Halyq Respýblikasy Qazaqstan úshin asa mańyzdy strategiialyq seriktes sanalady. Bizdiń elderimiz arasyndaǵy qarym-qatynas dostyqqa, ózara senimge negizdelgen. Qytai - bizdiń saýda-sattyǵymyz ben ózara investitsiiamyzda mańyzda orynǵa ie. Táýelsizdik jyldarynda Qytai bizdiń elimizge shamamen 17 mlrd dollar investitsiia saldy. Memleketterimiz arasyndaǵy taýar ainalymy artyp keledi. Tek 2017 jyly ǵana bizdiń baǵalaýymyzsha, 10,5 mlrd dollar, qytailyq derek boiynsha 18 mlrd dollardy qurap, ósim 33 paiyzdy qurady», - dedi Elbasy.
Qazaqstan Prezidenti búginde Qazaqstanda qytailyq kompaniialardyń qatysýymen ekonomikanyń munai-gaz, himiia, tamaq ónerkásibi, mashina jasaý, jeńil ónerkásip syndy túrli salalarynda 1200-den astam kásiporyn, sonymen qatar qytailyq iri úsh bank tabysty jumys istep jatqanyn aitty.
«Búgin maǵan baian etkendei, Iskerlik keńestiń otyrysy ótti. Onyń jumysyna eki taraptan 300-den astam biznes ókilderi qatysty. 13 mlrd dollardan astam somaǵa shamamen 40 qujatqa qol qoiyldy», - dedi Nursultan Nazarbaev.
Aita keteiik, Elbasy Nursultan Nazarbaev Qytaiǵa memlekettik saparmen kelip, keshe QHR Tóraǵasy Si Tszinpinmen keńeitilgen quramda kelissózder ótkizdi.
Nátijesinde birneshe qujatqa qol qoiyldy.
Sonymen qatar Memleket basshysy QHR Memlekettik keńesiniń premeri Li Ketsianmen, QR Prezidenti Búkilqytailyq halyq ókilderi jinalysy Turaqty komitetiniń tóraǵasy Li Chjanshýmen kezdesti.
Búgin, 8 maýsym kúni Nursultan Nazarbaev Beijińde Halyq batyrlary eskertkishine gúldestesin qoiý sharasyna qatysty.
Al 10 maýsym kúni QR Prezidenti Tsindao qalasynda ótetin Shanhai yntymaqtastyq uiymyna múshe memleketter basshylarynyń keńesine qatysady dep kútilýde.
