Qazaqstan Qyrǵyzstannyń narazylyq notasyna jaýap notasyn joldady, - dep habarlaidy "Ult aqparat" QR SIM baspasóz qyzmetine silteme jasap.
2017 jyldyń 20 qyrkúieginde Qazaqstan Respýblikasynyń Syrtqy ister ministrligine Qyrǵyz Respýblikasynyń ýaqytsha senimdi ókili shaqyrylyp, oǵan Qyrǵyzstan SIM-niń tańerteńgi málimdemesine bailanysty qazaqstandyq taraptyń kelesi mazmundaǵy jaýap notasynyń tabys etilgeni aitylady.
"... Qazaqstandyq tarap 19 qyrkúiekte Almaty qalasynda Qazaqstan Respýblikasynyń Prezidenti N.Á. Nazarbaevtyń Qyrǵyz Respýblikasynyń Prezidenttigine úmitker kandidattardyń birimen bolǵan kezdesýine orai Qyrǵyz Respýblikasynyń Syrtqy ister ministrliginiń áreketine qatty tańdanys bildiredi. Memleket basshysynyń ártúrli elderdiń kórnekti saiasi qairatkerlerimen jáne saiasi partiialardyń basshylarymen olardyń ótinishi boiynsha kezdesýleri turaqty túrde ótkizilip turady jáne halyqaralyq tájiribege tolyq sáikes keledi. Bul rette, mundai is-sharalar ashyq, transparentti sipatta ótip, buqaralyq aqparat quraldarynda keńinen jariialanady", - delingen QR SIM habarlamasynda.
SIM baspasóz qyzmetiniń málimetinshe, 14 tamyzda Astanada Memleket basshysy Qyrǵyz Respýblikasynyń prezidenttigine kandidattardyń biri, burynǵy premer-ministr Jeenbekovpen osyndai ekijaqty kezdesý ótkizdi.
"Oǵan qosa, Memleket basshysynyń tujyrymdaryn Qyrǵyz Respýblikasy Syrtqy ister ministrliginiń burys túsindirýine túsinbestik bildiremiz. Atalǵan kezdesýler barysynda Qazaqstan Respýblikasynyń Prezidenti Qyrǵyz Respýblikasy prezidenttigine qandai da bir naqty úmitkerdiń paidasyna qoldaý bildirgen joq. Onyń ústine Astana jáne Almaty qalalarynda qyrǵyz ókilderimen kelissózder barysynda Memleket basshysy baýyrlas qyrǵyz halqy senim bildirip, sailaityn Qyrǵyz Respýblikasynyń kez kelgen Prezidentimen tiimdi ózara is-qimyl jasaýǵa daiyn ekenin aitty. Osyǵan bailanysty Qyrǵyz Respýblikasynyń ishki isine aralasýǵa jáne el halqynyń tańdaýyna yqpal etý áreketine qatysty Qyrǵyz tarapynyń oidan shyǵarylǵan tujyrymdaryn tabandy túrde joqqa shyǵaramyz", - delingen SIM-niń notaǵa bergen jaýapta.
"Qyrǵyz Respýblikasy Syrtqy ister ministrliginiń mundai áreketi Qazaqstandyq tarap adaldyq tanytatyn, eki halyq arasyndaǵy dástúrli baýyrlastyq qatynastarǵa jáne Qazaqstan Respýblikasy men Qyrǵyz Respýblikasy arasyndaǵy odaqtyq qarym-qatynastar týraly shartqa túbegeili qaishy keledi dep sanaimyz..", - dedi vedomstvodaǵylar.
Eske sala keteiik, 19 qyrkúiekte Nursultan Nazarbaev Qyrǵyz Respýblikasynyń Prezidenttigine kandidat Ómirbek Babanovpen kezdesken bolatyn.
Keiinirek Qyrǵyzstan qazaqstandyq tarapqa narazylyq notasyn joldaǵan edi. Sondai-aq, osyǵan deiin saiasattanýshy Erlan Qarin Qyrǵyzstannyń narazylyq notasyna qatysty pikir bildirgen edi. "(...) Narazylyq notasyn jiberýdiń ózi múlde durys emes. Men keshe de jazǵan bolatynmyn, kandidattarmen jáne saiasi partiialardyń liderlerimen kezdesýler ótkizý burynnan kele jatqan tájiribe. (...) Bul qajet emes haip resmi Bishkektiń ózine ziian", - dep jazǵan edi Erlan Qarin Facebook jelisindegi paraqshasynda.
