Qorǵanys ministriniń orynbasary Sultan Kamaletdinov Qazaqstan Qyrǵyzstanǵa qandai áskeri kómek kórsetetinin aitty, - dep habarlaidy Tengrinews.kz tilshisi.
Depýtattar "Qazaqstan Respýblikasynyń Úkimeti men Qyrǵyz Respýblikasynyń Ministrler kabineti arasyndaǵy Ortalyq Aziia óńiri qaýipsizdigin qamtamasyz etýde áskeri-tehnikalyq kómek kórsetý týraly kelisimdi ratifikatsiialaý týraly" zań jobasyn talqylady.
Qorǵanys ministriniń orynbasary Sultan Kamaletdinov kelisimge 2021 jyly 7 jeltoqsanda Nur-Sultanda qol qoiylǵanyn aitty.
"Kelisim Qyrǵyzstanǵa bir rettik áskeri múlik berýdi qarastyrady, onyń ataýy men kólemi diplomatiialyq arnalar arqyly kelisilgen. Áskeri tehnikany Qyrǵyzstan Respýblikasynyń Koi-Tash eldi mekenine avtokólikpen jetkizý shyǵyndaryn qazaqstandyq tarap qamtamasyz etedi jáne kóteredi. Qyrǵyz tarapy alynǵan áskeri múlikti tek qaýipsizdik maqsatynda paidalanady, úshinshi tarapqa bermeidi jáne TMD-ǵa múshe memleketterge qarsy paidalanbaidy", - dedi Kamaletdinov.
Ol Ortalyq Aziiaǵa irgeles aimaqtardaǵy kúrdeli qaýipsizdik jaǵdaiǵa, sondai-aq aimaqtyq qaýipsizdikke tónetin qaýip-qaterdiń ósýine bailanysty áskeri-tehnikalyq kómek kórsetý Qyrǵyzstan Qarýly Kúshteriniń osy qaterlerge toitarys berýine jáne qaýipsizdikti kúsheitýine múmkindik beretinin atap ótti.
