Qazaqstan kelesi aidyń ortasynda Qyrǵyzstanǵa 100 mln dollar kóleminde tehnikalyq kómek kórsetýge daiyn. Ol qarjy kórshi eldi Eýraziialyq ekonomikalyq odaqtyń talaptaryna sáikestendirý maqsatynda bólinip otyr. Bul týraly Ortalyq kommýnikatsiialar qyzmetinde «Keden zanamasyndaǵy zań buzýshylyq» degen taqyrypta ótken brifingte QR qarjy ministri Baqyt Sultanov málimdedi, dep habarlaidy "Ult aqparat" Baq.kz portalyna silteme jasap.
«Qazaqstan Qyrǵyzstanǵa Eýraziialyq ekonomikalyq odaq talaptaryna sai kelý úshin 100 mln dollar kóleminde tehnikalyq kómek kórsetpek. Bul buryn talqylanǵan másele. Tehnikalyq kómek retinde keden beketiniń jabdyqtaryn bersek pe degen suraq bolǵan. Kóktemde tiisti kelisimshartty Qazaqstan Parlameti ratifikatsiialady. Biz atalǵan somanyń 41 mln dollaryn aqshalai berýge daiynbyz», - dedi ol.
Alaida ministr 100 mln dollar kólemindegi tehnikalyq kómekti kelesi aidyń ortasynda tolyq berýge múmkindik bar ekenin alǵa aitty.
«Búgin talqylanǵan (Úkimet otyrysynda – avtor) osy jyldyń biýdjetin naqtylaý týraly zań jobasynda bul másele tolyǵymen sheshilgen. Joǵaryda atalǵan tehnikalyq kómekti kelesi aidyń ortasynda aqshalai tolyq mólsherde berýge daiyn bolamyz. Atalǵan kómekti qabyldai ma, qabyldamai ma ony kórshi el (Qyrǵyzstan – avtor) ózi sheshedi. Ol jaqta kelisimshart ratifikatsiialanǵan. Qalǵanyn ýaqyt kórsetedi» , - dedi Baqyt Sultanov.
