Qazaqstan-Qyrǵyzstan shekarasynda karantindik ziiankestermen zaqymdanǵan jemistiń iri kólemi anyqtaldy. Bul jaiynda QR Aqparat jáne kommýnikatsiialar ministrliginen málim etti, dep habarlaidy Ult.kz tilshisi QazAqparat agenttigine silteme jasap.
Qazaqstannyń memlekettik shekarasynyń qyrǵyz ýchaskesinde kedendik, kóliktik, fitosanitarlyq jáne veterinarlyq baqylaýdy kúsheitý jónindegi josparly operatsiia jalǵasýda. Máselen, qazannyń 10-17-si aralyǵynda qyrǵyz tasymaldaýshylarynyń 835 kólik quraly tekserildi jáne olardyń ár segizinshisinde Qazaqstannyń kólik zańnamasyn óreskel buzý anyqtaldy. Nátijesinde 5 mln 644 myń teńge somasyna ákimshilik aiyppul salyndy. Fitosanitarlyq baqylaý kúsheitilgennen bastap 127 júk kóligi tekserilip, buzýshylyqtyń 20 faktisi anyqtaldy. Keri qaitarylǵan ónimniń jalpy salmaǵy 202 tonnany quraidy. Úsh fakti boiynsha Komstok symyry, Shyǵys jemis kóbelegi jáne Aziialyq jidek shybyny syndy karantindik jándik anyqtaldy. 16 qazanda Jambyl oblysyna qarasty Qarasý shekaralyq baqylaý beketinde Qyrǵyzstannan kele jatqan Volvo júk kóligindegi 20,6 tonna júkti (qurma, granat jáne júzim) tekserý barysynda Komstok symyry ziiakesi anyqtaldy.
Dál osy kúni Jambyl oblysynyń Qordai shekaralyq ótkizý beketinde Shymkentke kele jatqan Mercedes kóligindegi 2,9 tonna kólemindegi almany tekserý barysynda Shyǵys jemis kóbelegi tabyldy. Sonymen qatar 16 qazanda Jambyl oblysynyń Qordai aýdanyndaǵy Barys ýchaskesinde Almatyǵa apara jatqan 3 tonna júzimnen Aziialyq jidek shybyny anyqtaldy. Anyqtalǵan barlyq jemis-jidek Qyrǵyzstanǵa keri qaitaryldy.
Qyrǵyzstan tarapynan fitosanitarlyq talaptardyń jii buzylýy anyqtalǵan jaǵdaida Qazaqstannyń fitosanitarlyq qyzmeti Qyrǵyzstannan baqylaýǵa jatatyn ónimderdi tasymaldaýǵa jáne ákelýge shekteý engizýge májbúr bolady.
