Qazaqstan H5N8 qaýipti virýsy belgileriniń tabylýyna bailanysty Resei Federatsiiasymen shekaraǵa shekteýler qoidy, dep habarlaidy "Ult aqparat" QR Aýyl sharýashylyǵy ministrliginiń resmi saityna silteme jasap.
Ministrliktiń saitynda qus tumaýymen bailanysty erekshe qaýip aimaǵy - Qazaqstannyń soltústik-batysy ekeni aitylǵan.
«Osy jyldyń 3-4 tamyzynda Veterinarlyq jáne fitosanitarlyq qadaǵalaý boiynsha federaldy qyzmettiń Cheliabidegi basqarmasy aimaqta anyqtalǵan qus tumaýy virýsynyń genetikalyq belgileri týraly aqparat taratty. Óli qustardan alynǵan barlyq synamalarda H5N8 tumaýy virýsynyń kishi túri anyqtaldy. Qustardyń barlyq túrleri tumaýdy tez qabyldaityny belgili. Bul aýyl sharýashylyq, sinantropty jáne jabaiy qustarǵa jyldam juǵatyn ári lezde taraityn virýstyq aýrý. Sondyqtan, qus tumaýynyń jappai taralyp ketý qaýpi bar», - deligen habarlamada.
Osyǵan bailanysty, Ývel aýdanaralyq veterinarlyq zerthanasy, Cheliabi synaq zerthanasy jáne Vladimir qalasyndaǵy janýarlardyń densaýlyǵyn saqtaý federaldy ortalyǵy jasaǵan diagnoz negizinde, Qazaqstan aýmaǵynda epizootikalyq talaptardy saqtaý maqsatynda, QR Aýyl sharýashylyǵy ministrliginiń Veterinarlyq baqylaý jáne qadaǵalaý komiteti 2020 jyldyń 4 tamyzynan bastap Cheliabi oblysynan termiialyq óńdeýden ótpegen qustarǵa arnalǵan jemshóp qospalary (himiialyq jáne mikrobiologiialyq sintezdiń qospalarynan basqa), taksidermiialyq óńdeýden ótpegen aýlanǵan ań-qustar (tiri qustar, jumyrtqalar, qus eti jáne qus etiniń barlyq túrleri), sonymen qatar qustardy ustaýǵa, soiýǵa jáne kesýge qoldanylatyn qural-jabdyqtar ákelýge jáne tasymaldaýǵa ýaqytsha shekteýler engizdi.
Shekaralas aimaqtardaǵy epizotiialyq jaǵdaidy oblystardyń veterinarlyq qyzmeti erekshe baqylaýǵa aldy.
H5N8 adamdar úshin tómen patogendi dep sanalǵanymen, ǵalymdardyń pikirinshe, ol tez ózgeriske ushyrap, tumaýdyń basqa túrimen aýyrǵan jaǵdaida ólimge ákep soǵýy múmkin.
