Ulttyq Olimpiadalyq komitet 2022 jylǵy Beijiń oiyndaryna arnalǵan Qazaqstan komandasynyń formasyn kópshilik nazaryna usyndy. Qazirgi Qazaqstan tarihynda alǵash ret ekipirovkadaǵy el ataýy qazaq tilinde «Qazaqstan» bolyp jazylady, dep habarlaidy "Ult aqparat" Olympic.kz saityna silteme jasap.
Olimpiadalyq komandaǵa arnalǵan sporttyq formany qazaqstandyq ZIBROO kompaniiasy shyǵardy. Sherýge arnalǵan kollektsiiany reseilik dizainer, SHISHKIN brendiniń negizin qalaýshy Dmitrii Shishkin daiyndaǵan. Eki óndirýshi eń joǵary talaptarǵa sai keletin, óndiristegi eko-sheshimdi qoldaityn jáne kiim dizainynyń álemdik trendin qoldanatyn ortaq olimpiadalyq epikirovka kollektsiiasyn usyndy.
Qazaqstan quramasynyń olimpiadalyq ekipirovkasyn daiyndaýǵa bir jyldan asa ýaqyt ketti. Kiimdi daiyndaý protsesine atletterdiń ózderi qatysty. Olar formanyń dizainy, sapasy men fýnktsionalyna qatysty óz usynystaryn bildirgen.
«Bir aptadan soń Qazaqstannyń olimpiadalyq quramasy Qytaiǵa ushyp ketedi. Al 4 aqpan kúni tórtjyldyqtyń basty dodasy – qysqy Olimpiada bastalady. Tokio qarsańyndaǵy sekildi, bul oiyn bastalardan buryn da biz olimpiadalyq ekipirovkany daiyndaý kezinde sportshylardyń usynys-tilegin eskerdik. Biz úshin Olimpiada oiyndarynda sportshylarǵa osy formanyń yńǵaily, qolaily jáne sándi sezingenderi mańyzdy. Al mata men tigistiń eń joǵarǵy talapqa sai bolatyny sózsiz", - deidi UOK bas hatshysy Andrei Kriýkov.
Qysqy oiyndarǵa arnalǵan olimpiadalyq formanyń tanystyrylymyna jazǵy sport túrleriniń ókilderi, atap aitar bolsaq, Tokio Olimpiadasynyń júldegerleri Qamshybek Qońqabaev, Sáken Bibosynov pen Sofia Berýltseva qatysty.
Osylaisha, jazǵy sport túrindegi atletter qysqy Olimpiadaǵa attanatyn sportshylarǵa qoldaý kórsetip, olimpiadalyq quramanyń «Bir el – bir komanda» uranyn taǵy bir naqtylap otyr. Sondai-aq, fotosessiiaǵa dziýdoshylar Jansai Smaǵulov pen Aqmaral Naýatbek, bokstan erler komandasynyń kapitany Abylaihan Júsipov, gimnast Arýjan Qasenova men «Barys» hokkeishisi Samat Daniiar qatysty.
«Bizdiń komandamyzdyń olimpiadalyq formasynyń tanystyrylymyna qýana qatystym. Sporttyq kúntizbemizdegi aiyrmashylyqtarǵa bailanysty qysqy sport túrindegi atlettermen jii kezdespesek te, olardyń bizge kórsetken qoldaýyn umytqan emespiz. Tiisinshe, biz de Olimpiada kezinde otandastarymyzdyń basty jankúieri bolamyz.
Óitkeni, biz bir komandanyń – Qazaqstan quramasynyń namysyn qorǵaimyz. Formaǵa keler bolsaq, sapasy qatty unady. Kúrtesheler jeńil ári jyly, dizainy da jinaqy. Qazaqstan sóziniń «Q»arqyly, iaǵni, qazaqsha jazylǵany kóńilge jyly tiedi eken. Bul forma Beijińge attanatyn barlyq sportshymyzǵa da unaitynyna senimdimin. Olimpiada oiyndarynda barlyǵyna shyn júrekten sáttilik tileimin», - dedi bokstan Tokio Olimpiadasynyń júldegeri, álem chempiony Sáken Bibosynov.
«Formanyń tanystyrylymyna shaqyrtý alǵanymda tań qaldym ári qýandym. Óitkeni, qysqy sporttaǵy atletterimizdiń nátijesin únemi qadaǵalap júremin. Bir kún boiy ózimizdi model sezindik. Mundai qyzyq jobaǵa qatysý men úshin úlken tájiribe. Forma qatty unady, túsi de, epikirovkanyń sapasy da qýantady. Óte jyly ári denege jaqsy turady. Sportshylar jabyq ǵimarattarda da, úlken stadiondarda da ózderin yńǵaily sezinetini anyq. Aitpaqshy, olardyń eń stildi bolatynyna da kúmánim joq. Aldaǵy eń mańyzdy jarysta qazaqstandyq komandaǵa sáttilik tileimin. Alǵa!», - dedi Tokio Olimpiadasynyń júldegeri, karateshi Sofia Berýltseva.
Pandemiia kezinde jeńil ónerkásip basqa da salalar sekildi búkil álem boiynsha kedergilerge tap boldy. Taýardy jetkizý logistikasy buzyldy, tipti, álemdegi eń úlken brendterdiń ózi kiimdi burynǵydai merzimde, burynǵydai kólemde shyǵara almaidy. Sondyqtan, jetkizýshini tańdaý kezindegi basty talap – senimdilik, tigin ónerkásibindegi aldyńǵy tehnologiialardy paidalaný, odan bólek, kiimdi daiyndaýdaǵy tolyq óndiristik tsikl bolatyn.
Sherýge arnalǵan formany tigý kóptegen jyldar boiy iri kompaniialarmen, fýtbol jáne hokkei klýbtarymen jumys isteitin, sondai-aq, FISCHER kompaniiasyna arnap Eýropaǵa taý shańǵysy ekipirovkasyn eksporttaityn «SHISHKIN tigin manýfaktýrasyna» senip tapsyryldy.
Dizainerler bul jobaǵa tolyqqandy daiyndaldy, Qazaqstannyń mádeni erekshelikteri men álemdik sán trendindegi mańyzdy jaittardy saraptady. Kiimdegi jazýǵa biregei shrift tańdaldy. Jarysty qabyldaýshy eldiń dástúrleri de nazardan tys qalǵan joq. Olimpiada ótetin jyl sý jolbarysy jylymen sáikes keledi, al shyǵys kúntizbesi boiynsha 2022 jylǵy tús «talaptaryna» aspan kók, qara jáne aq tús sáikes keledi. Beijińde Qazaqstan komandasy birtutas oilastyrylǵan jiyntyqqa ie bolady.
Kiim Qytaidaǵy qysqy klimatqa arnaiy oilastyrylǵan. Munda temperatýra kei kezderi 20 gradýstan da tómendeidi. Sondyqtan, syrtqy kiim tabiǵi qazdyń júnimen tolyqtyrylǵan, jylýdy saqtap, sýyqty ótkizbeitin zamanaýi jarǵaqtyq materialdar qoldanylǵan. Kólemine qaramastan, kiimniń salmaǵy az, óte iilimdi jáne erkin qozǵalýǵa yńǵaily. Dizainerlerdiń paiymynsha, olimpiadashylar bul formany sportttyq arenadan basqa jerlerge de kie alady.
Qysqy Olimpiada oiyndary 4 aqpan kúni Beijińde bastalyp, 20 aqpanǵa deiin sozylady. Qazaqstan komandasy sporttyń segiz túrinen baq synaidy.
