«Halyq kommýnisteri» fraktsiiasynyń depýtattary Qazaqstanda erler men áielderdiń zeinet jasyn 60-qa deiin tómendetý usyndy, dep habarlaidy "Ult aqparat".
«Dúniejúzilik densaýlyq saqtaý uiymynyń málimeti boiynsha COVID-19 virýsynyń ereksheligi jasy alpystan asqan adamdardy alyp ketip jatýynda. Adam alpystan keiin qartaiyp, immýndyq reaktsiiasy tómendeitindikten, densaýlyq jaǵdaiy nasharlap, aýrý-syrqaýy kóbeiedi. Bul jaǵdai virýs juqtyrý yqtimaldyǵyn arttyryp, indet juqtyrǵan jaǵdaida alpystan asqan kisi qaitys bolyp ta ketýi múmkin», - dedi Qazaqstan kommýnistik halyq partiiasy Ortalyq komitetiniń hatshysy, QR Parlamentindegi atalmysh partiia fraktsiiasynyń jetekshisi Aiqyn Qońyrov Parlament Májilisiniń jalpy otyrysynda.
Onyń keltirgen málimetine sáikes, Qazaqstanda 2020 jyldyń tamyz aiynan beri 110 981 adam qaitys bolǵan. Olardyń ishinde jasy alpystan asqandardyń sany – 78 637, iaǵni 71 paiyzy. Kún sýyǵandyqtan el ishinde tumaý-syrqaý artyp, COVID-19 virýsynan ólim-jitim yqtimaldyǵy kúsheie túsedi.
«Qazaqstan halqy úlkenge qurmet kórsete biletin jurt. Kommýnister COVID-19 virýsynyń ekinshi tolqyny keletini boljanyp jatqan ýaqytta ásirese egde jastaǵy kisilerdi saqtaýymyz kerek dep esepteidi. Olardyń oqshaýlanýyna jaily jaǵdai jasalyp, olardyń máselelerin rettei bilýimiz kerek. Osyǵan bailanysty «Halyq kommýnisteri» fraktsiiasy azamattarymyzdyń zeinetke shyǵý jasyn qaita qaraýdy usynady. 2013 jyly áielderdiń zeinet jasyn uzartý boiynsha zeinetaqylyq reformaǵa qarsy shyqqan edik. Respýblikanyń túkpir-túkpirindegi azamattarymyzdyń únine qulaq asa otyryp, áielder men er adamdardyń zeinet jasyn 60-qa deiin tómendetýdi usynamyz», - dedi ol.
