Qazaqstan kókpar federatsiiasynyń prezidenti Erlen Ospanov jartylai finalda qazaq kókparshylary laiyqty deńgeide óner kórsetti dep sanaidy.
Dúniejúzilik kóshpendiler oiyndarynda Qazaqstan quramasy jartylai finalda Ózbekstanǵa ese jiberip, finalǵa shyǵa almai qalǵan edi. Osydan keiin kókpardan Qyrǵyzstan komandasynyń burynǵy basshysy Talas Begaliev qazaq kókparshylary qyrǵyzdarmen oinaýǵa qorqyp, ózbekterden ádeii jeńilip qaldy dep málimdegen bolatyn. Qazaqstan kókpar federatsiiasy kókpar tóńiregindegi shýǵa túsinikteme berip, alyp-qashpa áńgimege senbeýge shaqyrdy.
"Munyń bári alyp-qashpa áńgime, shyndyqqa janaspaidy. Qazaq kókparshylary óte jaqsy oinady. Jeńildi dep te aitýǵa bolmaidy, esep aiyrmasy onsha kóp bolǵan joq, 5:4. Oiyn tikelei efirde kórsetildi, jigitter bar kúshin saldy. Komanda quramy — jastar. Bizdiń maqsatymyz jastardy osyndai úlken dodalarda shyǵaryp, shyńdap alý boldy. Bul endi týrnir ǵoi, alda talai jarystar bar. Biik belesterge jetemiz dep oilaimyn", — dedi Ospanov.
Qazaqstannyń kókpar federatsiiasy Qyrǵyzstannyń ishki ister organdaryna Talas Begaliev týraly aitqan.
"Osy jerdiń ishki ister organdaryna Talas Begaliev degen adam kelip, oiynshylardy arandatty dep aittyq. Qazir olar osy ispen ainalysyp jatyr… Qazaqstannyń qurama komandasy otyrǵan avtobýsqa kirip, "namystaryń joq" degen siiaqty aýyr sózder aitqan. Eki eldi arazdastyrmaq bolǵan", — dedi federatsiia prezidenti.
Ospanovtyń pikirinshe, kókpar tóńireginde osynshama shý kóterýdiń ar jaǵynda Qyrǵyzstannyń saiasi kúshteri jatyr.
"Bizdiń maqsatymyz — eki eldiń tatýlyǵy, kókpar oiynynyń órkendeýi. Laiyq deńgeide óner kórsettik dep sanaimyn. Bul jarysta kókparǵa osynshama nazar aýdaryp, shý kóterýdiń ar jaǵynda qyrǵyz eliniń saiasi kúshteri jatyr dep oilaimyn. Sebebi bul sonshalyqty baibalam salatyn másele emes edi. Sport bizdi tatýlastyrýy kerek, biz tek sol maqsatta kelip otyrmyz. Qyrǵyz baýyrlarymyzdy bir týǵan, aǵaiyn dep sanaimyz, eshqashan olarmen arazdaspaimyz", — dedi ol.
Sondai-aq, Erlen Ospanov aqtyq syndaǵy oiynǵa qatysty jeke pikirimen bólisti.
"Finalda qyrǵyz kókparshylary jeńedi dep oilaimyn. Óitkeni, kóshpendiler oiyny óz elderinde ótip jatyr, onyń ústine komanda da myqty. Biraq, bárin oiyn kórsetedi ǵoi", — deidi federatsiia prezidenti.
