Qazaqstandyq quqyqtanýshy-ǵalym Erkin Ońǵarbaev prezident sailaýyndaǵy halyqtyń belsendiligi týraly pikir bildirdi, dep habarlaidy QazAqparat.
«Meniń oiymsha, Qazaqstanda sailaý quqyǵy deńgeii aitarlyqtai ósti. Halyqtyń belsendiligi joǵary, ásirese referendým kezinde buǵan kýá bolǵan edik. Bul joly da qoǵamnyń sailaýdy ádil ótkizýge degen suranysy joǵary boldy. Bul túpki nátijege áser etedi. Búginde kóptegen másele sheshimin taýyp jatyr. Qańtar oqiǵasynan keiin Konstitýtsiiaǵa birqatar ózgeris engizildi. Biz qazir adam quqyǵyn qorǵaý fýnktsiiasynyń artyp kele jatqanyn, Konstitýtsiialyq sottyń qurylǵanyn, quqyqtyq qorǵaýdyń joǵary deńgeiin, adam quqyqtary jónindegi Konstitýtsiialyq zańnyń ústemdigin kórip otyrmyz. Munyń bári bizde azamattyń quqyqtary men bostandyqtarynyń óte joǵary qorǵalýyna yqpal etedi», - dedi Erkin Ońǵarbaev Jibek Joly telearnasyndaǵy sailaý taqyrybyna arnalǵan tok-shoýda.
Onyń aitýynsha, jer qoinaýy bailyǵynyń halyqqa tiesili bolýy - mańyzdy reforma.
«Biz joǵaryda atalǵan máseleni birneshe ret talqylap, onyń iske asatynyn aittyq. Elimizdiń bolashaǵy - óskeleń urpaq tabysqa ie bolmaq. Bul da - aýqymdy sharýa. Halyqtyń ál-aýqaty kóptegen elderdegidei, sonyń ishinde arab elderindegidei ósetinine kúmánim joq. Kiris kóbeiip, azamattarymyz jer qoinaýyndaǵy paidaly qazbalardan tabys tabady. Alaida, negizgi suranys - áleýmettik ádilettilik pen oligarhiiamen kúreske qatysty. Eger ádilet saltanat quryp, sheteldegi qarjy qaitarylsa, meniń oiymsha, qoǵam ony qýana qabyldaidy. Eger qoǵamnyń úmiti aqtalsa, bolashaqta sailaýshylardyń tulǵalardy qoldaýy artady dep oilaimyn», - deidi ol.
