Qazaqstan Korei Halyq Demokratiialyq Respýblikasynyń 2017 jyldyń 21 mamyrynda zymyran ushyrýyn qatań aiyptaidy. Bul týraly QR Syrtqy ister ministrligi baspasóz qyzmetiniń jetekshisi Ánýar Jainaqov habarlady, dep jazady «QazAqparat» HAA tilshisi.
«Atalǵan áreket BUU Qaýipsizdik Keńesiniń 1718 (2006 jylǵy), 1874 (2009), 2087 (2013), 2094 (2013) jáne 2270 (2016) qararlaryn óreskel buzý bolyp tabylady. Qazaqstan aimaqtyq, jahandyq qaýipsizdikke qater tóndirip, halyqaralyq qaýymdastyqtyń iadrolyq qarýsyz bolashaqty qamtamasyz etýge salǵan kúsh-jigerine nuqsan keltiretin jaýapsyz áreketterge jol bermeý qajettigin málimdeidi», - dedi Jainaqov.
Ol Qazaqstannyń KHDR-dy taǵy da áskeri jáne iadrolyq baǵdarlamalarynan bas tartýǵa, BUU QK qararlaryn ustanýǵa jáne kópjaqty kelissózder protsesin qaita jandandyrýǵa shaqyratynyn atap ótti.
Buǵan deiin habarlanǵandai, KHDR kezekti zymyran ushyrylymyn júzege asyrdy. Soltústikkoreialyq zymyran shamamen 500 shaqyrym ushyp baryp, Japoniianyń airyqsha ekonomikalyq aimaǵyna taiaý jerge qulady. Japondyq jáne ońtústikkoreialyq áskerilerdiń derekterine sáikes, KHDR batysyndaǵy Pýkchhan ýezi aýmaǵynan ushyrylǵan zymyran shamamen 500 shaqyrym ushyp, Japon teńizine qulaǵan.
