Qazaqstanda áielderdiń sany birtindep azaiyp keledi, dep habarlaidy Sputnik Qazaqstan agenttigi Ranking.kz portalyna silteme jasap.
Resmi málimetke sáikes, 2022 jyldyń basynda Qazaqstan halqynyń sany 1,3 protsentke ósip, 19,12 million adamǵa deiin jetken. Sonyń ishinde áielder - 9,84 million, al erkekter - 9,29 million. Osylaisha, jyldyń basynda áielderdiń úlesi 51,44 protsent bolǵan. Bir jyl buryn bul kórsetkish 51,48 protsent edi. Bes jyl buryn 51,62, al on jyl buryn 51,77 bolǵan.
Biyl úsh aidyń qorytyndysy boiynsha halyqtyń sany 19,18 millionǵa deiin ósti. Sonyń ishinde áielder - 9,86, erkekter - 9,31 million adam. Osylaisha, áielderdiń úlesi taǵy azaiyp, 51,43 protsentke deiin túsken.
"Jalpy, áielderdiń úlesi erkekterge qaraǵanda joǵary bolyp saqtalsa da, jyl saiyn tómendep keledi. Máselen, sońǵy bes jylda áielderdiń sany ortasha eseppen jyl saiyn 1,2 protsentke ósip otyrady, al erkekterdiń kórsetkishi 1,4 protsent", - deidi mamandar.
Áielderdiń jalpy sany erkekterden basym bolyp tursa da, jas sanatyna qarai jaǵdai múldem basqasha. Máselen, 14-28 jas aralyǵyndaǵy áielderdiń sany 0,1 protsentke azaiyp, jyl basynda 1,83 million bolǵan. Al osy sanattaǵy erkekterdiń sany, kerisinshe, 0,1 protsentke ósip, 1,92 millionǵa deiin jetken. Bul da turaqty dinamika bolyp otyr. 2022 jyldyń basynda jas áielderdiń úlesi 48,87 protsentti qurady. Sondai-aq, osy sanattaǵy qyzdardyń sany jyl saiyn azaiyp keledi.
Máselen, bir jyl buryn kórsetkish 48,92 protsent bolǵan, bes jyl buryn — 49,5%, al on jyl buryn 49,88% deńgeiinde turǵan.
"Osylaisha, "statistika boiynsha 10 qyzǵa 9 jigit" degen stereotiptiń Qazasqtanǵa eshbir qatysy joq. Qazirgi statistika boiynsha Qazaqstanda qyzdar emes, uldar kóp týylady. 2021 jyly 216,2 myń qyz dúniege kelse, uldardardyń sany 230,3 myń bolǵan. Qyzdardyń úlesi 48,4 protsent", - delingen taldaýda.
Al neke jasyndaǵy (28 jasqa deiin) myń jigitke 956 qyz keledi eken. Jyl saiyn osy aiyrmashylyq artyp barady. Statistika boiynsha Qazaqstanda áielderdiń sany erkekterden artyq. Sebebi áielder uzaǵyraq ómir súredi.
