2018 jyldyń 1 mamyryndaǵy jaǵdai boiynsha, Qazaqstanda halyq sany 18 mln 232 adamdy qurady. Bul 2017 jyldyń sáikes kezeńimen salystyrǵanda 238,5 myń adamǵa nemese 1,3 protsentke kóp, dep habarlaidy "Ult aqparat" QR UEM Statistika komitetine silteme jasap.
Atap aitqanda, onyń ishinde qala turǵyndarynyń sany 10 mln 492,2 myń adamdy nemese jalpy halyqtyń 57,5 protsentin qurasa, aýyldyq jerde turatyn adamdar sany 7 mln 739,8 myń adamǵa jetti. Bul, el halqynyń 42,5 protsenti.
Biyl qańtar-sáýir aralyǵynda respýblikada 1 jasqa deiingi 1095 sábi shetinegen (byltyr - 1054). Bul, byltyrǵydan 3,9 protsentke kóp. 2018 jyldyń tórt aiynda sábilerdiń shetineýi jańa týǵan 1000 nárestege (8,68) shaqqanda 8,81 jaǵdaidy qurap otyr.
2018 jyldyń qańtar-sáýirinde 2017 jyldyń osy kezeńimen salystyrǵanda Qazaqstanǵa kelýshiler sany 25,1 protsentke azaiyp, Qazaqstannan ketken adamdar sany 20,8 protsentke artqan. Negizgi migratsiialyq almasý TMD elderimen bolyp otyr. TMD elderine kelgender men ketkenderdiń sany sáikesinshe 77,3 jáne 88,8 protsentti quraidy.
El ishinde kóship-qonýshylar sany 24,9 protsentke azaidy. Óńiraralyq kóship-qonýdyń oń saldosy eldiń tórt óńirine - Almaty (12 013 adam) jáne Astana (3699 adam), Mańǵystaý (48 adam) jáne Aqmola (39 adam) oblystaryna tiesili.
