Qazaqstan halqynyń sany 2019 jyldyń 1 mamyry boiynsha 18 mln 468 myń 900 adamǵa jetip, 2018 jyldyń 1 mamyrynan beri 239 900 adamǵa artty, dep habarlaidy Ulttyq ekonomika ministrligi Statistika komiteti.
Tarqata aitqanda, Qazaqstandaǵy qalalar halqynyń sany 10 mln 751,4 myń adamdy (jalpy, halyq sanynyń 58,2 paiyzy), aýyl halqy 7 mln 717,5 myń adamdy quraǵan.
Osy jyldyń qańtar-sáýir ailarynda respýblikada 1 jasqa deiingi 1 138 bala shetinegen (ótken jyldyń qańtar-sáýir ailarynda 1 095 bala). Bala ólimine negizinen perinataldy kezeńdegi jaǵdailar sebep bolyp jatady. Osy sebepter boiynsha qańtar-sáýir aralyǵynda 584 bala kóz jumǵan (ótken jyldyń uqsas kezeńinde 506). Anomaliiamen týǵan balalardyń 223-i (ótken jyldyń uqsas kezeńinde 239) ómirden ótti. Tynys alý múshesiniń aýrýynan 92 bala, qaiǵyly jaǵdailar men ýlanýdan, jaraqattardan 37 bala jan tapsyrǵan.
Osy jyldyń qańtar-sáýir ailarynyń aralyǵynda Qazaqstanǵa kelýshilerdiń sany 10,8 paiyzǵa azaiyp, ketken azamattardyń sany 23,4 paiyzǵa artty. Migratsiialyq aǵyn kóbinese TMD elderine qatysty bolyp otyr. TMD-dan kelgen jáne ketkenderdiń úlesi 83,4 paiyz jáne 89 paiyzdy qurady.
El ishindegi migratsiia 15,7 paiyzǵa kóbeidi. Aimaqaralyq sipatta oń saldo eldiń tórt oblysynda Mańǵystaý oblysy (579), Shymkent qalasy (2 768), Nur-Sultan (8 463) men Almaty (9 363) qalalarynda baiqalady.
