2020 jyldyń sońyna deiin Qazaqstan halqynyń 99,3% keń jolaqty internetti paidalanatyn bolady, – dep habarlaidy «Ult aqparat».
Bul týraly QR Tsifrlyq damý, innovatsiialar jáne aeroǵarysh ónerkásibi ministrligi habarlady.
Aqparatqa sáikes, biylǵy jyl basynan beri 649 shalǵai aýylǵa talshyqty-optikalyq bailanys jelileri tartylyp, keń jolaqty internet qosyldy. Al 2020 jyldyń sońyna deiin bailanys operatorlary barlyǵy 1250-den astam aýyldy sapaly internetpen qamtamasyz etetin bolady.
«Ol úshin 20 myń shaqyrym talshyqty-optikalyq bailanys jelisi tartylýda. Memlekettik-jekeshelik áriptestik aiasynda júzege asyrylyp jatqan joba 2018 jyly bastaldy. Onyń basty maqsaty – 3700-den astam memlekettik organ men biýdjettik uiymdardy, onyń ishinde mektep, aýrýhana, ákimdik jáne taǵy basqasyn keń jolaqty internetke qosý. Sonymen qatar, joba júzege asyryla bastaǵaly beri shalǵaidaǵy 962 aýyl jyldamdyǵy joǵary internetpen qamtyldy», - dedi vedomstvodan.
QR Tsifrlyq damý ministrligi Telekommýnikatsiia komitetiniń tóraǵasy Vitalii Iaroshenkonyń aitýynsha, bul joba basqa da jobalardy júzege asyrýǵa múmkindik týǵyzbaq.
«Shalǵaidaǵy aýyldarǵa jyldamdyǵy joǵary internetti tartý úshin infraqurylym qajet. Qazir bailanys operatorlary tiisti infraqurylym - «Optika» jelisin tartyp jatyr. Bul, mobildik operatorlarǵa osy «optotalshyqqa» qosylýǵa jáne sapaly internetpen qamtýǵa múmkindik beredi. Osylaisha, 3G/4G mobildi tehnologiiasy nemese symsyz bailanysý tehnologiiasy boiynsha bir aýyl ǵana emes, jaqyn mańdaǵy aýyldar da keń jolaqty internetke qosylady», - dep atap ótti V.Iaroshenko.
Ministrlik Qazaqstanda internet jelisin odan ári damytýǵa baǵyttalǵan taǵy bir joba iske asyrylyp jatqanyn eske saldy.
«Onyń aiasynda, 2020 jyldyń sońyna deiin uialy bailanys operatorlary 3G/4G mobildik jáne FWA - FixedWireless Access symsyz bailanysý tehnologiialaryn qoldana otyryp, turǵyn sany 250-den kóp aýyldardyń bárin keń jolaqty internetke qosady. Ministrlik uialy bailanys operatorlarymen birge yntymaqtastyq týraly tiisti memorandýmǵa qol qoidy. Osylaisha, osy jyldyń sońyna qarai el halqynyń 99,3% keń jolaqty internetti paidalanatyn bolady», - dedi vedomstvodan.
