Jyl basynan beri qazaqstandyqtarǵa 1,2 trillionnan astam teńgege zeinetaqy tólendi. Bul týraly QR Eńbek jáne halyqty áleýmettik qorǵaý ministrliginiń baspasóz qyzmeti habarlady.
«2020 jyldyń qańtar-maýsym ailarynda respýblikalyq biýdjetten bazalyq zeinetaqy tóleýge – 381,9 mlrd teńge, yntymaqty zeinetaqy tólemderine 851,9 mlrd teńge baǵyttaldy.
Al biylǵy maýsym aiynda respýblikalyq biýdjetten zeinetaqy tólemderine – 209,6 mlrd teńge, onyń ishinde bazalyq zeinetaqy tóleýge – 64,8 mlrd teńge, yntymaqty zeinetaqy tóleýge 144,8 mlrd teńge bólindi», - delingen aqparatta.
1 shildedegi jaǵdaiǵa sáikes, Qazaqstanda zeinetkerler sany 2 mln 221 myń adamdy quraidy.
Zeinetaqy tólemderiniń ortasha mólsheri (onyń ishinde bazalyq zeinetaqy) 2020 jylǵy 1 shildedegi jaǵdai boiynsha 94 777 teńgeni qurady.
«Eske salaiyq, 2018 jylǵy 1 shildeden bastap memlekettik bazalyq zeinetaqy tólemi, onyń zeinetaqy júiesindegi tájiribesin eskere otyryp, ár alýshyǵa jeke taǵaiyndalady.
Bul rette, 1998 jylǵy 1 qańtardaǵy jaǵdai boiynsha yntymaqty júiede jumys istegen ýaqyty, sondai-aq mindetti zeinetaqy jarnalary tólengen kezeńder (MZJ) zeinetaqy júiesindegi eńbek ótiline qosylady.
Sonymen, eger zeinetaqy júiesindegi jumys ótili 10 jyl nemese odan az bolsa, sondai-aq eger múlde joq bolsa, bazalyq zeinetaqy eń tómengi kúnkóris deńgeiiniń 54% quraidy, sodan keiin 10 jyldan asqan ár jyl úshin onyń mólsheri 2% artady. Mysaly, eger siz 20 jyl qatyssańyz, bazalyq zeinetaqy kúnkóris deńgeii qunynyń 74%, 30 jyl – kúnkóris qunynyń 94% quraidy. 33 jáne odan da kóp jyl jumys ótili bolsa, kúnkóris qunynyń 100% joǵary mólsherinde belgilenedi», - dep túsindirdi ministrlikten.
Eger bir ai ishinde MZJ birneshe ret Biryńǵai jinaqtaýshy zeinetaqy qoryna jasalsa, jinaqtaýshy júiege qatysý merzimi bir aidy quraidy.
Osylaisha, mindetti zeinetaqy jarnalary neǵurlym turaqty jáne tolyq salynatyn bolsa, zeinetaqy jasyna jetkende bazalyq zeinetaqy tólemderiniń mólsheri soǵurlym kóp bolady.
Óz kezeginde, jasyna bailanysty zeinetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 ai qajet) jáne zeinetkerlikke deiingi kezeńde alynǵan ortasha ailyq tabysqa bailanysty bolady.
