«Qazaqstan halqyna» qory qańtar oqiǵalary kezinde qaza tapqandar men jaralanǵandardyń otbasylaryna kómek kórsetedi. Bul týraly atalǵan qordyń tóraǵasy Bolat Jámishev málim etti, dep habarlaidy QazAqparat.
Onyń aitýynsha, Qamqorlyq keńesi qaza bolǵan áskerilerdiń, ishki ister organdary, ulttyq qaýipsizdik organdary qyzmetkerleriniń otbasylaryna kómek kórsetý sheshimin qabyldady. Munymen qosa, qyzmetkerler arasynda aýyr jaraqat alǵandar da qamtylmaq. 3 qaza tapqan jáne 4 jaralanǵan balanyń otbasy, sondai-aq qańtar oqiǵasy kezinde kezdeisoq qurban bolǵandardyń otbasylary eskerilmek.
«Azamattardyń tizimine toqtalsaq, biz ombýdsmenderden alǵan tizimdi nazarǵa aldyq. Osy oraida Bala quqyqtary jónindegi ýákil Arýjan Sain men Adam quqyqtary jónindegi ýákil Elvira Ázimovanyń joldaǵan aqparaty qaraldy. Árine, bul adamdar azamattyq tulǵalardyń qaitys bolýynyń barsha faktisin bilmeýi múmkin. Alaida olarǵa joldanǵan úndeýlerge jáne keibir isterdiń rezonanstylyǵyn eskere otyryp, olar (ombýdsmender) tiisti tizimdi jasady», - dedi B. Jámishev Ortalyq kommýnikatsiialar qyzmetinde.
Osy oraida ol qańtar oqiǵasynyń kezdeisoq qurbany bolǵandardyń týystaryna kómek kórsetý týraly sheshim qabyldanǵanyn jetkizdi.
«Bizge kelip túsken tizimge bailanysty bul adamdardyń qaza bolýynyń mán-jaiyn quzyrly organdarmen anyqtaý kerek bolady. Osy derekterdiń anyqtalýyna qarai kómek kórsetetin bolamyz. Atap aitqanda, qaiyrymdylyq qory retinde qańtar oqiǵasynyń kezdeisoq qurbandaryna kómek kórsetemiz degen belgi berip otyrmyz. Ózderińiz bilesizder, tergeý amaldary aiaqtalǵannan keiin, osy bastamalardy tolyq kólemde iske asyrý múmkin bolady», - dedi B. Jámishev.
Aita keteiik, búgin «Qazaqstan Halqyna» qory qańtar oqiǵalary kezinde qaza tapqandar men jaralanǵandardyń otbasylaryna kómek kórsetýge qatysty málimet jariialady.
