«Qazaqstan halqyna» qoǵamdyq qoryna úsh aida 126 mlrd teńge qarjy tústi. Bul týraly atalǵan qordyń tóraǵasy Bolat Jámishev málim etti, dep habarlaidy QazAqparat.
«126 mlrd teńge tústi, onyń negizgi bóligi iri tólemshilerden boldy. Sonymen qatar, qomaqty qarajat aýdarǵan orta kásiporyndar da barshylyq. Bizdińshe, osy kásiporyndar biylǵa arnalǵan josparlaryn oryndap shyqty», - dedi Jámishev Ortalyq kommýnikatsiialar qyzmetinde.
Sonymen qatar ol jeke adamdar da óz qarajatyn baǵyttap jatqanyn atap ótti.
«Qazirgi kezde qor qarajatyn tolyqtyrýǵa qatysty basqa baǵyttardan kelip jatyr. Iaǵni, qarajat shaǵyn somada jeke adamdardan jiberilip otyr. Olar Kaspi.kz arqyly múmkindiginshe aqsha bólgenin kórip jatyrmyz», - dedi Bolat Jámishev.
Budan buryn habarlanǵandai, qańtar oqiǵasynda qaza bolǵan 13 adamnyń týystaryna qordan qarajat aýdarylmaq.
«Búginde qaza tapqan 19 jáne aýyr jaralanǵan 106 Ishki ister ministrligi, Ulttyq qaýipsizdik komiteti qyzmetkerleriniń otbasy múshelerine jáne Qorǵanys ministrligi men Respýblikalyq ulannyń áskeri qyzmetshilerine materialdyq kómek kórsetildi. Jalpy soma 451 mln teńgeni qurady», - dedi L. Shyńǵysbaeva.
Sondai-aq ol qańtar oqiǵasynda jazataiym qaza bolǵandardyń týystaryna qarajat bólingenin aitty.
